#Gaeltacht ag treochtáil ar na meáin shóisialta
Tá an focal #Gaeltacht ar na haischlibeanna is mó úsáid ar Twitter in Éirinn inniu, a bhuí le feachtas de chuid Údarás na Gaeltachta.
D’fhógair an tÚdarás le déanaí gurb é inniu, 25 Iúil, ‘Lá na Gaeltachta’ ar na meáin shóisialta agus é mar sprioc ag an bhfeachtas comhrá faoi na ceantair Ghaeltachta a spreagadh i measc an phobail mhóir.
Tá na mílte duine tar éis trácht a scríobh ar Twitter, Instagram agus Facebook ag úsáid na haischlibe #Gaeltacht agus ag pointe amháin tráthnóna inniu bhí sé ar an 8ú hábhar is mó a bhí faoi chaibidil ar Twitter in Éirinn.
Tá daoine ag roinnt smaointe, cuimhní cinn agus grianghrafanna a bhaineann leis an nGaeltacht agus tá an deis á tapú chomh maith aird a dhíriú ar chuid na dúshláin atá roimh an teanga agus roimh phobal a labhartha sna croíthailte traidisiúnta.
Is i nGaeilge agus i mBéarla araon atá ábhar á fhoilsiú ar na hardáin éagsúla agus tá réimse leathan eagraíochtaí, gnólachtaí agus daoine aonair, in Éirinn agus thar lear, ag glacadh páirt san fheachtas.
Tá blaiseadh anseo de chuid den phlé atá ar siúl ar líne faoi láthair, léim isteach ann tú féin agus glac páirt sa lá!
