Is é inniu an spriocdháta d’amhránaithe agus ceoltóirí ar mian leo cur isteach ar chomórtas a roghnóidh an t-amhrán a bheidh san iomaíocht ar son na hÉireann ag féile mhór idirnáisiúnta.
Tá an Comórtas Amhrán Náisiúnta Pan-Cheilteach ar siúl an mhí seo chugainn agus is ann a roghnófar an t-amhrán a chanfar ar son na tíre seo ag an bhFéile Idirnáisiúnta Phan-Cheilteach 2020 a bheidh ar siúl i gCeatharlach um Cháisc.
Tá duais €1,000 ann do bhuaiteoir an chomórtais náisiúnta chomh maith ach ní ghlacfar le hiarratais tar éis 5.00pm tráthnóna, Dé hAoine 17 Eanáir.
Ní foláir don amhrán a bheith as Gaeilge agus caithfidh na focail agus an ceol a bheith nuachumtha.
Cuirfear fáilte roimh amhráin ó amhránaithe aonair, ó ghrúpaí ceoil nó bannaí agus glacfar le gach stíl amhránaíochta, cinn traidisiúnta, bailéid, pop-amhráin, amhráin tíre, rac, snagcheol nó eile.
Déanfar gearrliosta de na hiarratais agus beidh na hamhráin a roghnófar le canadh beo ag an gComórtas Náisiúnta, a bheidh ar siúl oíche Dé Sathairn, 22ú Feabhra in Amharclann GB Shaw, Ceatharlach.
Bronnfar an duais airgid agus an trófaí ar an mbuaiteoir an oíche sin agus rachaidh an t-amhrán a roghnófar ar aghaidh le bheith san iomaíocht ar son na hÉireann leis na hamhráin nua-chumtha eile as Albain, an Bhreatain Bheag, Oileán Mhanann, Corn na Breataine agus an Bhriotáin ag an bhFéile Idirnáisiúnta Phan-Cheilteach 2020.
Tá rialacha uile an chomórtais agus foirm iarratais ar www.panceltic.ie. Is féidir sonraí a fháil chomh maith ach teagmháil a dhéanamh le Glór Cheatharlach ar 085 1340047 nó 087 2857048 nó is féidir scríobh chuig pancelticcarlow@gmail.com.
