2,855 cás nua den choróinvíreas a d’fhógair an Roinn Sláinte tráthnóna.
515 othar a bhfuil Covid-19 orthu atá sna hospidéil, 15 níos mó ná mar a bhí i gceist inné. Tá 91 díobhsan in aonad dianchúraim, beirt níos lú ná mar a bhí ann inné.
Dúirt Paul Reid, Príomhfheidhmeannach Fheidhmeannacht na Seirbhíse Sláinte, go bhfuil neart daoine ag fáil na snáthaide i gcónaí.
Dúirt sé gur beagnach 15,000 duine a fuair an vacsaín le sé lá anuas.
Ní bhíonn sé “riamh rómhall” an vacsaín a fháil, ar sé.
Cuirfear tús an tseachtain seo le dáileadh na teanndáileoige den vacsaín in aghaidh an Covid-19 do dhaoine atá 60 bliain d’aois nó os a chionn.
Idir an dá linn, dúirt Colm Gildernew, Cathaoirleach Choiste Sláinte Stormont, go mb’fhéidir go mbeadh gá le hathoscailt na n-ollionad vacsaíne siúl isteach sa Tuaisceart chun cabhrú le dáileadh na teanndáileoige ansin.
D’fhógair Roinn Sláinte an Tuaiscirt inniu go raibh deichniúr eile a raibh an Covid-19 orthu tar éis bháis. 948 cás nua a fógraíodh. 2,715 duine a raibh an Covid-19 orthu a fuair bás sa Tuaisceart ó thús na paindéime.
326 othar Covid-19 atá in ospidéil an Tuaiscirt agus 36 díobhsan atá in aonad dianchúraim.
