Tabharfaidh iarUachtarán Stáit Aontaithe Mheiriceá, Donald Trump, é féin suas do na húdaráis in Georgia inniu chun déileáil leis na cúisimh atá curtha ina leith.
Tá sé á chúiseamh in uisce faoi thalamh a bheith ar bun aige in 2020 chun toradh an toghcháin sa stát sin a chur ar ceal – toghchán a chaill seisean.
Is é Trump an chéad Uachtarán nó iarUachtarán ar Stáit Aontaithe Mheiriceá a cúisíodh agus tá trí chás coiriúil eile curtha ina leith.
Inniu agus Trump á thabhairt féin ar láimh do na húdaráis, beidh an ceantar thart ar an bpríosún faoi “dhianghlasáil” ar chúinsí slándála, a d’fhógair Oifig Shirriam Fulton County.
Tá baracáidí curtha taobh amuigh den chúirt agus an áit á réiteach do theacht an iarUachtaráin inniu.
Dúirt an Sirriam go mbeadh na baracáidí ansin go dtí an Satharn. Ní hé Trump amháin a bheidh ag triall ar an gcúirt an tseachtain seo mar tá 19 duine ar fad cúisithe agus gan acu ach go dtí meán lae Dé hAoine le hiad féin a thabhairt suas do na húdaráis ionas go ndéanfar na cúisimh a phróiseáil. Bhí sin déanta ag mórsheisear díobh inné.
Cúisíodh Trump agus a chomhchosantóirí an tseachtain seo caite agus é curtha ina leith go ndearna siad iarracht toil thoghthóirí stát Georgia a threascairt trí chur isteach ar thorthaí an toghcháin in 2020 sa stát sin.
Ag iarrthóir an pháirtí Dhaonlathaigh, an tUachtarán Joe Biden, a bhí an bua sa stát.
Tráth a raibh vótaí an stáit fós á gcomhaireamh, tá taifead fóin ann den Uachtarán Trump agus é ag cur brú ar Rúnaí Stáit Georgia, an Poblachtánach Brad Raffensperger, agus é ag fógairt air “aimsigh 11,780 vóta”.
Chuir an Breitheamh Scott McAfee in Atlanta bannaí $200,000 ar Donald Trump agus cuireadh fainic air gan imeaglú ná bagairt a dhéanamh ar fhinnéithe ná ar aon duine den 18 cosantóir eile.
Faoi choinníollacha na mbannaí sin, atá sínithe ag Fani Willis, Dlíodóir Dúiche Fulton County, ag dlíodóirí Trump agus ag an mBreitheamh, níl cead aige aon imeaglú nó bagairt a dhéanamh ar na meáin shóisialta ach oiread. Luaitear go sonrach “aon phostálacha ar na meáin shóisialta nó aon fhreagra ar phostálacha” a dhéanann aon duine eile.
Is sean-nós ag Trump leas a bhaint as na meáin shóisialta, a chomhlacht féin a chruthaigh TRUTH Social san áireamh, mar ardán chun ionsaí a dhéanamh ar dhaoine a mbíonn aon bhaint acu le cásanna coiriúla ina aghaidh.
Tá an t-iarUachtarán i mbun feachtais toghcháin faoi láthair d’fhonn tréimhse eile a fháil sa Teach Bán in 2024.
Is minic cheana a rinne Trump ionsaí gránna ar Fani T. Willis, dlíodóir Fulton County atá i mbun an cháis ina choinne, agus líomhaintí á ndéanamh aige nach raibh fíor ach a chothódh cantal.
Faoin socrú a bhaineann lena chuid bannaí níl cead aige “aon bhagairt d’aon chineál, díreach ná indíreach” a dhéanamh ar fhinnéithe ná ar a chomhchosantóirí agus níl cead aige aon chumarsáid a bheith aige leo faoin gcás seo ach amháin trí dhlíodóirí.
Tá sé séanta go minic ag an iarUachtarán go ndearna sé féin aon rud contráilte agus deir sé gur cúrsaí polaitíochta is bonn leis na cúisimh seo.
Tá sé ar cheann an chomhairimh faoi láthair sa bhfeachtas d’iarrthóir na bPoblachtánach i dtoghchán uachtaránachta 2024.
Níor bhac Trump le páirt a ghlacadh sa díospóireacht teilifíse a bhí ag iarrthóirí Poblachtánacha tráthnóna aréir, Dé Céadaoin.
Thart ar leathmhíle duine a bhíonn faoi ghlas i bPríosún Fulton County, mar a mbeidh Trump á thabhairt féin ar láimh do na húdaráis in Georgia. De ghnáth daoine iad a bhíonn ag fanacht lena lá sa gcúirt. Tá drochbhail ar an bpríosún féin agus tá fiosrúchán ar bun faoi láthair faoin bhfoirgneamh féin agus faoin spídiúlacht a deirtear a thugtar do phríosúnaigh ann.
Cúisíodh Donald Trump agus an ocht nduine dhéag eile an tseachtain seo caite as a bheith páirteach i gcomhcheilg chun torthaí Georgia a threascairt.
Tá ionchúisitheoirí agus oifigigh shlándála in Atlanta ar a mbionda ag gealladh gur mar a chéile a dhéileálfaidh córas dlí agus cirt Atlanta leis na cosantóirí agus a chaithfidís le haon choirpeach eile.
Tógfar a bpictiúir agus a méarloirg, agus baileofar na bannaí airgid ach tuairiscíodh go mbeadh éilimh bhreise shlándála ag an tSeirbhís Rúnda ó tharla iarUachtarán a bheith i gceist.
Ar an 15 Eanáir 2024, stát ar stát, a thosóidh na toghcháin thosaigh a thabharfaidh deis do Phoblachtánaigh a rogha mar iarrthóir i dtoghchán na hUachtaránachta a phiocadh.
Ar an rogha sin atá feachtas Trump dírithe, a deirtear.
