Aistear álainn meallacach é ‘Do Shamhlaigh Mé Tír Nua…’ le Macdara Ó Faoláin
Féirín a bhronn Macdara Ó Faoláin orainn maidin Luain é an EP úr Do Shamhlaigh Mé Tír Nua…, eisithe mar réamhtheachtaí ar an chéad albam aonair leis an Déiseach atá le teacht san fhómhar. D’oibrigh an t-amhránaí, a bhfuil bua ar leith aige le téaduirlisí, leis an chumadóir Cormac McCarthy ar an dá thogra ach cé go dtagann “ceol na heisiúna seo ón domhan céanna leis an albam,” is iad cóirithe aonair agus strumáil an Fhaolánaigh a sheasann amach chun tosaigh anseo. Agus nach orainne atá an t-ádh.
Tosaíonn Do Shamhlaigh Mé Tír Nua… amach le strumáil éadrom a chuirfeadh aon duine ar a shuaimhneas mar a bheadh fáilte rompu suí agus oíche airneáil a chaitheamh cois tine. Ach nuair a chéadchluineann siad guth Mhacdara, tuigfidh siad nach suaimhneas amháin atá ann ach cumha. Brón b’fhéidir. Sonas saoithiúil fiú.
Is mire mothúchán de shaghas é ‘Anam Lách an Cheoil’ nach féidir a rangú ar an chéad éisteacht ach atá ina chatairsis ar gach casadh ina dhiaidh sin. Gan trácht a dhéanamh ar mháistreacht an ionstraimithe arís, sin áilleacht an amhráin agus fágann sé go bhfuil tú ag iarraidh filleadh air arís agus arís eile.
Géaraítear an luas sa chéad dá thraic eile, ‘Go Moch’ agus ‘Foraois an Iúir/Fear na Fliúite/Port na Síochána’. Comhpháirtíocht le fear an ghiotár baratóin Conor O’Sullivan atá i gceist le ‘Go Moch’. I ndiaidh chatairsis an chéad amhrán, airíonn sé gur anáil dhomhain ar mhaidin fhionnuar é an t-amhrán seo. Is oiriúnach an teideal é mar sin. Tógann ‘Foraois an Iúir’ ar an fhuinneamh seo chun rithim thógálach a thairiscint. Tairiscint ar cheart glacadh léi nó chuirfeadh strumáil Mhacdara ag damhsa thú láithreach.
Leanann Ó Faoláin seo le cóiriú “tobchumtha” de ‘The Lark in the Clear Air’ a léiríonn cé chomh cumasach agus atá sé le cordaí beachta a sheinm. Amhrán eile atá anseo a spreagann tocht lena áilleacht.
Tarraingíonn Macdara ar shaothar an domhain Chlasaicigh fosta agus gigue le Bach óna chóiriú ‘Partita No. 3 in E Major’ le cluinstin ar ‘Partita No. 3 in E Major, BWV 1006: VII. Gigue’.
Léirítear cumas measctha ar thraic a 6, ‘You Should See the Other Guy/Leite a’ Bhóthair/Cois Trá ar Maidin’. Tosaíonn an t-amhrán le piocadh deas réidh sa chluas chlé amháin sula dtagann strumáil fhuinniúil isteach sa chluas dheas. Nuair a thig fuaim an olldoird isteach, atá á sheinm ag Micheal Riordan, thiocfadh leat céilí a chaitheamh i do chistin agus an t-amhrán ag tógáil is ag tógáil go deireadh an tseit.
Cuireann an Faolánach clabhsúr ar an cheirnín leathfhada le ‘Suantraí na hOíche’. Ní gá tuilleadh a rá faoi scil Mhacdara le huirlisí ag an phointe seo nó níl séanadh ar bith air sin. Portaireacht an Fhaolánaigh, áfach, atá go hálainn agus a mheascann go hiontach le feadóg mhór Johnny McCarthy, ar a leagtar an bhéim anseo. Tá a ghuth sólásach ar an dóigh chéanna le ‘Anam Lách an Cheoil’ ach le tuilleadh nirt taobh thiar dó. Is cinnte gur suantraí é seo ach ní fhéadfainn a rá go raibh mé réidh dul a chodladh ina dhiaidh — chuir mé an EP ag dul arís láithreach.
Ar deireadh, tairgeann Do Shamhlaigh Mé Tír Nua… aistear álainn meallacach d’éisteoirí. Cuimhnigh, áfach, nach seo deireadh an aistir agus go mbeidh tuilleadh le cluinstin faoin am a thagann an fómhar. Tá an EP le fáil ar Spotify, Apple Music agus ar eile anois. Caith leathuair leis. Is cinnte go mbeidh tú leis i bhfad níos mó ná sin áfach.
The post Aistear álainn meallacach é ‘Do Shamhlaigh Mé Tír Nua…’ le Macdara Ó Faoláin appeared first on NÓS.
