Tá éacht déanta ag grúpa daltaí Gaeltachta agus an dara háit san Eoraip bainte amach acu i gcomórtas fiontraíochta san Iodáil an tseachtain seo.
Cúigear daltaí de chuid Phobalscoil Chorca Dhuibhne – Kate Ní Shúilleabháin, Katie Ní Éineacháin, Ríona Ní Ghealbháin, Oisín Ó Dubhda agus Cian Ó Gallchóir – a ghnóthaigh an duais i gComórtas Chomhlacht na Bliana de chuid Junior Achievement Europe.
Bhunaigh an cúigear an mionchomhlacht ‘Glan go Glas’, a dhíríonn ar tháirgí glantacháin éiceabhách a tháirgeadh. D’éirigh leo ionadaíocht a dhéanamh ar Éirinn sa chomórtas Eorpach tar éis dóibh buachan i gcomórtas náisiúnta Chlár na gComhlachtaí de chuid Údarás na Gaeltachta.
Bhí comórtas na hEorpa ar siúl i gCatania, sa tSicil le déanaí, áit a raibh breis is 800 fiontraí óg ó níos mó ná 40 tír san iomaíocht.
Rinne Príomhfheidhmeannach Údarás na Gaeltachta, Tomás Ó Síocháin, comhghairdeachas le daltaí Chorca Dhuibhne.
“Is éacht iontach é seo do Glan go Glas agus do Phobalscoil Chorca Dhuibhne. Léiríonn sé go soiléir an tallann agus an nuálaíocht atá ag ár n-aos óg sa Ghaeltacht.
“Tá sé mar fhianaise ar an tábhacht a bhaineann le cláir mar Chlár na gComhlachtaí chun scileanna fiontraíochta a chothú i measc ár ndaoine óga, ag cinntiú go bhfuil todhchaí gheal i ndán d’fhiontraíocht sa Ghaeltacht.”