Tháinig an 13ú leagan d’Fhéile Ghaeltacht Thír Eoghain chun deiridh ar na mallaibh in Institiúid Ceannasaíochta na hÉireann sa sráidbhaile Cabhán an Chaorthainn.
Is cúrsa Gaeltachta do dhaoine fásta é an fhéile seo a mhaireann trí lá. Bíonn idir bhunrang, mheánrang agus ardrang ar siúl agus go leor deiseanna do na foghlaimeoirí teacht le chéile agus a gcuid Gaeilge a úsáid ag am lóin.
Thug Meon Eile cuairt ar lá deireanach an chúrsa, tráth a bhí bronnadh na dteastas ar siúl. De réir Aoife Ní Luachráin, a theagasc an meánrang le linn an chúrsa, bhí sé iontach tábhachtach go mbeadh aitheantas ceart tugtha do na daoine a d’fhreastail ar na trí lá mar gheall ar an iarracht mhór mhaith a rinne siad i mbliana.
Labhair muid fosta le Seán Mac Nia, a theagasc an t-ardrang, faoin bhéim a chuir sé ar chaint na Gaeilge agus scileanna comhrá sna ranganna s’aige.
