Tuigtear do Tuairisc go gcuirfidh an Feisire Parlaiminte Claire Hanna, arb as Gaeltacht Chonamara di ó dhúchas, a hainm chun cinn anocht le dul san iomaíocht do cheannaireacht an SDLP.
Is í Claire Hanna, a ghlac i nGaeilge le mionn dílseachta Westminster le déanaí, is mó atá á lua mar an chéad cheannaire eile ar an SDLP ó tuairiscíodh go raibh sé i gceist ag Colum Eastwood éirí as an ról sin.
Tuigtear do Tuairisc, go bhfuil sé i gceist ag Hanna ceannaireacht an pháirtí a lorg.
Bheadh sí ar an seachtú ceannaire ar an SDLP agus an dara bean le bheith ina ceannaire ar an bpáirtí.
Tá Eastwood ina cheannaire ar an bpáirtí ó 2015 agus tá sé ina Fheisire Parlaiminte in Westminster don Fheabhal, suíochán ar éirigh leis é a choinneáil i dtoghchán an Mheithimh.
Is í Claire Hanna, an feisire parlaiminte do Bhéal Feirste Theas agus an Dún Láir, a léiroidhre mar cheannaire, dar le mórán.
As Bearna i nGaeltacht Chonamara ó thús do Claire Hanna agus is ann a chaith sí a luath-óige, tráth a raibh a hathair Eamon Hanna ag obair le hÚdarás na Gaeltachta.
Choinnigh Éamon agus a bhean Carmel an teach i mBearna nuair a bhog siad go Béal Feirste sna 1980idí agus caitheann muintir Hanna go leor ama ann i gcónaí.
Ag labhairt di cheana faoin cheangal atá aici le Gaeltacht Chonamara, dúirt Claire Hanna gurb é Bearna “a baile spioradálta”. Cé nach bhfuil Claire Hanna líofa a dóthain sa Ghaeilge chun agallamh beo a dhéanamh, labhair sí Gaeilge roinnt uaireanta in Westminster agus tacaíonn sí go láidir leis an teanga agus le cearta teanga.
Meastar go bhfógrófar comharba Eastwood roimh chomhdháil bhliantúil an pháirtí i mí Dheireadh Fómhair.
An duine eile is mó atá á lua leis an bpost ná Matthew O’Toole, ceannaire an pháirtí in Stormont.
Cé gur éirigh le Eastwood agus Hanna a suíocháin a choimeád don SDLP in Westminster, níor éirigh rómhaith leis an bpáirtí trí chéile.
Tá an SDLP faoi bhrú mór ó síníodh Comhaontú Aoine an Chéasta in 1998 agus a áit mar phríomhpháirtí an náisiúnachais tógtha ag Sinn Féin.
Agus John Hume agus Seamus Mallon mar spreagadh aige, chuaigh Eastwood isteach san SDLP an bhliain chéanna chun dul i mbun feachtasaíochta ar son an chomhaontaithe.
In 2022 chaill an SDLP ceithre shuíochán i dtoghchán Thionól Stormont.
Gan fágtha ag an bpáirtí ach ocht suíochán áit sa bhfreasúra a bhí i ndán dóibh.
In 2023 chaill an páirtí 20 suíochán sna toghcháin áitiúla agus chríochnaigh siad sa chúigiú háit.
Toghadh Colum Eastwood mar ionadaí poiblí den chéad uair in 2005 nuair a d’éirigh leis suíochán a fháil ar Chomhairle Chathair Dhoire. Idir 2010-2011 bhí sé ina mhéara ar Dhoire, an méara is óige riamh ag an gcathair.
I mBealtaine 2011 toghadh mar bhall de Thionól Stormont é den chéad uair agus in 2019 d’éirigh leis an suíochán a bhíodh ag an SDLP san Fheabhal a bhuachan ar ais ó Shinn Féin.
Is é Eastwood an dara ceannaire páirtí sa Tuaisceart a d’éirigh as an mhí seo.
D’éirigh Doug Beattie as mar cheannaire an UUP mar gheall ar “dheacrachtaí doréitithe”.
