Pod don Eolach II – sraith nua de phodchraoladh NÓS
Cuirfear tús an mhí le sraith a dó de phodchraoladh NÓS, Pod don Eolach. Beidh an chéad eagrán den dara sraith dár bpodchraoladh á thaifeadadh amárach i stiúideo nua Raidió Fáilte, a osclaíodh níos luaithe i mbliana.
Is é eagarthóir NÓS, Maitiú Ó Coimín, a bheidh sa gcathaoir arís don tsraith seo agus aíonna éagsúla ó gach cearn den tír in éineacht leis gach seachtain. Is iad Ciarán Mac Giolla Bhéin agus Gráinne Ní Ghilín, beirt atá aitheanta go maith i saol na Gaeilge i Ultaibh agus atá an-ghníomhach sa ngrúpa An Dream Dearg, a bheidh sa stiúideo le Maitiú an tseachtain seo, agus na hailt is mó léamh ar NÓS á bplé acu.
“Tá mé ag súil le tús a chur leis an bplé arís. Bhí an-tóir ar Pod don Eolach an bhliain seo caite agus bhí sé ar cheann de na rudaí is mó a tharraing caint agus plé i measc ár leantóirí ar líne. Tá muid ag súil le bheith ag obair le stáisiúin pobail ar fud na hÉireann arís i mbliana agus in áiteacha eile freisin.
“Tugann Pod don Eolach deis dúinne aithne níos fearr a chur ar ár léitheoirí, agus cuirfidh ár léitheoirí aithne níos fearr ar ár scríbhneoirí. Tá sé mar sprioc againn eagrán a thaifeadadh i ngach contae, ní gá go ndéanfaí sin in aon sraith amháin, ach bhí muid i gcúig nó sé chontae cheana,” a dúirt Maitiú.
An bhliain seo caite, taifeadadh eagráin de Pod don Eolach i mBaile Átha Cliath, i mBéal Feirste, i nGaillimh agus i nDoire in ionaid éagsúla. Chuathas chomh fada le New York i mí na Bealtaine le heagrán speisialta a dhéanamh leis an eagraíocht teanga Gaeil Nua-Eabhrac sa gcathair sin, agus tá súil ag NÓS tuilleadh eagrán idirnáisiúnta a thaifeadadh sna seachtainí amach romhainn.
Is mian linn freastal ar ár léitheoirí ar fad timpeall na hÉireann agus ba mhaith linn an podchraoladh a thabhairt “ar an mbóthar” an oiread agus is féidir. Mar sin, más léitheoir dílis de chuid NÓS thú agus tú i do chónaí i mbaile nach raibh muid ann go dtí seo, tá míle fáilte romhat ríomhphost a chur chugainn ag eolas@nos.ie. Ní mór ar a laghad beirt a bheith ar fáil le páirt a ghlacadh sa bpodchraoladh agus ionad cuí ann.
Tá fáil ar shraith a haon de Pod don Eolach ar leathanach SoundCloud NÓS agus beidh na heagráin go léir le cur ar fáil ar ardáin éagsúla podchraoltaí amach anseo.
