Níl aon chinneadh déanta fós Comórtas Peile na Gaeltachta 2020 a chur siar de bharr paindéim Covid-19.
Deir óstaigh chomórtas na bliana seo, Naomh Anna Leitir Móir, nach bhfuil aon rogha eile acu ach leanúint orthu ag fáil réidh chun tús a chur leis an gcomórtas deireadh seachtaine na Cincíse in ainneoin na héiginnteachta atá ann faoi láthair.
D’fhógair Cumann Lúthchleas Gael an tseachtain seo caite go raibh siad ag cur stop le himeachtaí ag gach leibhéal ar fud na tíre go dtí an 29 Márta.
Is beag seans go gcuirfear tús le cluichí go luath ina dhiaidh sin, áfach, agus é ráite ag an Taoiseach Leo Varadkar go bhféadfadh go mairfeadh an ghéarchéim sa tsláinte phoiblí go dtí amach sa samhradh.
Bhí coiste náisiúnta Chomórtas Peile na Gaeltachta le bualadh le chéile i nGaillimh an deireadh seachtaine seo chun comórtas na bliana seo a phlé ach bhí orthu an cruinniú a chur ar athlá de bharr na géarchéime.
Deir rúnaí an choiste náisiúnta, Mícheál Mac Donnchadha, nach fios cén uair is féidir an cruinniú sin a athsceidealú agus nach féidir aon chinneadh a dhéanamh faoin gcomórtas go dtí go mbeidh léargas níos fearr acu faoina bhfuil le teacht ó thaobh cúrsaí sláinte phoiblí.
Fiú má bhíonn cluichí CLG á n-imirt roimh thús an tsamhraidh, tá gach seans ann go mbeidh deacrachtaí ann na babhtaí cáilithe a chríochnú in am, go háirithe i nGaillimh agus i nDún na nGall, áiteanna ina mbíonn níos mó cluichí i gceist.
Mar sin féin, tá sé ráite ag cumann Naomh Anna Leitir Móir go gcaithfear glacadh leis go mbeidh an comórtas ar siúl idir an 29 Bealtaine agus 1 Meitheamh go dtí go gcloisfear a mhalairt.
“Ní hé an cinneadh s’againne é [an comórtas a chur siar], is suas ag an gCoiste Náisiúnta atá sé,” a deir Pádraig Ó Conghaile, Cathaoirleach Naomh Anna.
“Tá beagán plé déanta againn leo agus le Cumann Lúthchleas Gael ach níl aon treoir faighte againn go fóill.
“Tá muid ag coinneáil orainn mar a bheadh. Beidh orainn an obair uile a bheith déanta anseo agus dá mbeadh muid le stopadh, ní bheadh rudaí réidh in am.”
Bhronn Roinn na Gaeltachta deontas beagnach €270,000 ar Naomh Anna chun obair a dhéanamh le bheith réidh do Chomórtas Peile na Gaeltachta agus deir Ó Conghaile go bhfuil siad fós in ann dul ar aghaidh leis na hoibreacha sin.
“Tá muid ag coinneáil orainn leis an bhforbairt timpeall na páirce, leis an seastán nua agus an t-athchóiriú ar na seomraí feistis. Caithfidh muid an obair sin a chríochnú in am pé scéal é.”
