D’fhéadfadh go mbeadh ainmneacha Gaelacha ar na stoirmeacha a thiocfaidh go hÉirinn an bhliain seo chugainn.
I gcomhar lena chéile a shocraíonn Met Éireann, Oifig Met na Breataine agus Institiúid Ríoga Meitéareolaíochta na hÍsiltíre liosta na n-ainmneacha do stoirmeacha agus tá cinn 2020/2021 fógartha inniu acu.
Oscar agus Saidhbhín an dá ainm Gaeilge atá ar liosta nua na stoirmeacha agus tá dhá ainm eile ar an liosta a bhféadfadh fréamhacha Gaeilge a bheith acu, Aiden (ó Aodhán) agus Darcy (ó dhorcha).
Má bhíonn de mhí-ádh orainn go dtiocfaidh Oscar nó Saidbhín an bealach seo tá an-drochaimsir i ndán dúinn mar is in ord aibítre a thiocfaidh na stoirmeacha.
Bunaítear an liosta ar ainmneacha a mholann an pobal agus déantar iarracht ainmneacha a roghnú ar furasta do dhaoine ó thíortha eile iad a rá go cruinn.
Is in 2015 a thosaigh Met Éireann agus Oifig Met na Breataine ag obair i dteannta a chéile ar liosta na n-ainmneacha a chur le chéile agus tháinig Institiúid Ríoga Meitéareolaíochta na hÍsiltíre isteach leo in 2019.
De réir mar a thagann stoirmeacha chun cinn, ainmnítear iad de réir na n-ainmneacha ar liosta na n-oifigí meitéareolaíochta ag tosú le hainm a thosaíonn le ‘A’.
Ní bhaintear úsáid as aon ainm a thosaíonn le Q, U, X, Y nó Z.
Má bhíonn stoirm a bhuaileann talamh in Éirinn ainmnithe ag tír éigin eile roimhe sin cloítear leis an ainm sin. Mar shampla, thug an Lárionad Náisiúnta Hairicíní i Meiriceá Ophelia agus Lorenzo ar stoirmeacha a bhuail Éire le blianta beaga anuas.
Tugtar ainm ar aon stoirm a mheastar a d’fhéadfadh a rian á fhágáil ar tír, nó ar ghaotha móra a n-eisítear foláireamh stádas ‘oráiste’ nó ‘dearg’ ina dtaobh.
Ainmneacha Stoirmeacha 2020-21
Aiden
Bella
Christoph
Darcy
Evert
Fleur
Gavin
Heulwen
Iain
Julia
Klaas
Lilah
Minne
Naia
Oscar
Phoebe
Ravi
Saidhbhín
Tobias
Veronica
Wilson
