Tá líon na dTeachtaí Dáil le méadú ó 160 go dtí 174 sa chéad Dáil eile.
Tá an moladh sin san athbhreithniú ar theorainneacha na ndáilcheantar, atá curtha faoi bhráid Thithe an Oireachtais ag An Coimisiún Toghcháin ar maidin.
43 dáilcheantar a bheidh sa chéad olltoghchán eile seachas 39.
Agus cur chuige coimeádach glactha chucu féin ag an gCoimisiún, is beag athrú atá le déanamh ar na dáilcheantair sna contaetha Gaeltachta. Tá Dún na nGall, Ciarraí agus Port Láirge ar na seacht ndáilcheantar nach bhfuil athrú ar bith le déanamh orthu.
Deir an Coimisiún gurb é an príomhrud a bhí le réiteach i gcás Dhún na nGall ná deireadh a chur le ‘sárú’ na teorann i ndeisceart an chontae, ach measadh sa deireadh nach bhféadfaí sin a dhéanamh mar go mbeadh athrú rómhór ó thaobh daonra i gceist.
Aistreofar toghranna áirithe ó Chorcaigh Thiar Thuaidh isteach i ndáilcheantar Chorcaigh Thuaidh-Lár, ach cuirfear leis toghranna eile ó Chorcaigh Thuaidh-Lár agus Corcaigh Thoir.
Tá an chuid de dheisceart Mhaigh Eo, timpeall ar Bhaile an Róba, a bhí le Gaillimh Thiar sa toghchán deireanach le haistriú ar ais agus suíochán breise le tabhairt do Mhaigh Eo.
Fanfaidh Gaillimh Thiar ina dháilcheantar cúig shuíochán. Beidh suíochán breise i nGaillimh Thoir agus cuid de Gaillimh-Ros Comáin le cur leis.
Tá 19 dtoghroinn, ina bhfuil 9,484 duine, le haistriú ón Mí Thiar, mar a bhfuil Gaeltacht Ráth Chairn, isteach go dtí An Longfort- An Iarmhí. San Iarmhí atá na toghranna atá le haistriú agus fanfaidh an Mhí Thiar ina ndáilcheantar trí shuíochán.
Beidh suíochán breise sa Mhí Thoir, mar a bhfuil Baile Ghib, agus dáilcheantar ceithre shuíochán á dhéanamh de.
I mBaile Átha Cliath a bheidh cúigear den 14 Teachta Dála breise sa chéad Dáil eile. Beidh dáilcheantar nua i mBaile Átha Cliath agus é beartaithe ag an gCoimisiún go ndéanfaí dhá dháilcheantar de Bhaile Átha Cliath- Fine Gall.
Tá dhá dháilcheantar déanta chomh maith de Thiobraid Árann agus de Laois-Uíbh Fhailí.
Dáilcheantair ceithre shuíochán seachas cúig shuíochán a bheidh i gCill Mhantáin agus Loch Garman feasta ach tá dáilcheantar nua cruthaithe an taobh sin tíre, Cill-Mhantáin-Loch Garman.
Méadófar líon na ndáilcheantar trí shuíochán ó naoi go dtí 13 agus líon na ndáilcheantar cúig shuíochán ó 13 go dtí 15. Laghdófar líon na ndáilcheantar ceithre shuíochán ó 17 go dtí 15.
Is fearrde na páirtithe móra an dáilcheantar trí shuíochán mar go mbíonn an cuóta ag 25%. I ndáilcheantar cúig shuíochán, bíonn an cuóta níos ísle ag 16.6%, agus meastar go gcuidíonn sin le páirtithe beaga nuair a bhítear ag fiach ar na suíocháin deiridh lá an chomhairimh.
Tá daonra an stáit seo ardaithe agus breis is 5.1 milliún ina gcónaí sa tír faoi láthair agus faoi mBunreacht ní mór Teachta Dála amháin a bheith againn in aghaidh gach 20,000-30,000 duine sa dáilcheantar.
Faoi láthair níl ach aon dáilcheantar amháin as an 39 dáilcheantar atá againn sa tír nach bhfuil níos mó ná 30,000 duine ann in aghaidh gach Teachta Dála.
Faoi théarmaí an athbhreithnithe seo, bhí de cheart ag an gCoimisiún Toghcháin cur leis an 160 Teachta Dála atá againn faoi láthair – go dtí idir 171-181 Teachta.
