Obair na gcapall déanta ag Buttle agus Stephens don tríú babhta as a chéile
Cad é seo, go díreach?
Bailiúcháin de na rianta is mó tóir as an rogha cheoil a bhíonn á casadh ag úinéirí an lipéid Mr Bongo, David Buttle agus Gareth Stephens (thíos), ar a gclár raidió agus i gclubanna mar Jazz Rooms in Brighton Shasana.
Bí ag súil le seoda de rianta aduaine Brasaíleacha, Afracacha, dioscó agus búgaí domhanda.
Tá lipéad Mr Bongo 30 tríocha bliain ar an bhfód i mbliana.
An bhfuil aon mhaith ann?
As na hatheisiúintí ar fad a tháinig i mo threo i gcaitheamh na bliana 2018, ba é an bailiúchán Mr Bongo Record Club Volume 2 is mó a thug sásamh dom. Tá Volume 3 ar aon chaighdeán leis.
Seacht gcinn de bhuamaí func agus dioscó Afrai-Bhrasaíleach gan cháim a chuireann tús le cúrsaí, an ‘A Gira’ iontach de chuid Trio Turnera agus samba-sól blasta ‘Pisa No taboado’ le Abaeté, agus leagan snasta Os Flippers d’aintiún búgaí Marcos Valle, ‘Estrelar’, ina measc.
Ní féidir misneach ‘You Can Be A Star’ le Luther Davis Group a shéánadh, port iontach sól-func ó thaobh geal na sráide. “Put a smile on your face / And let us dance this night away”, a chanann Luther, agus is féidir amhlaidh a dhéanamh anois ar phraghas níos réasúnta ná an €756.50 a chosnóidh an bunleagan ón bhliain 1979 ar cheirnín seacht n-orlach atá ar díol ar Discogs.
Poirt atá chomh spreagúil céanna ná an leagan fada de ‘Don’t Stop’ (1976) leis an ngrúpa jazz-funk Spaceark as San Francisco, agus port ramhar afrai-func de chuid Maruma Khomo na hAfraice Theas dar teideal ‘Khomo Tsaka Deile Kae?’ .
Thit mórán daoine i ngrá le port pianó-func maorga Galt MacDermot , ‘Cold Coffee’, is é le clos ar eagrán den gclár Netflix ‘Better Call Saul’. Aithneoidh saoithíní hip haip ‘Cold Coffee’ mar phríomh ábhar samplála ‘The Truth’ de chuid Handsome Boy Modelling School. Omós cuí atá ann mar rogha agus McDermott imithe ar shlí na fírinne i mbliana.
Bhí draíocht sa stiúidió an lá a dhein Tokyo Academy Philharmonic Chorus Group taifeadadh ar ‘Taharazaka’.
Dá mbeadh scannáin Western Sergio Leone suite i bPoblacht na Liobáine bheadh fuaim mar atá le clos ar Dance of Maria de chuid Elias Rahbani curtha ag Ennio Morricone leo.
Samhlaigh Joey Ramone ag truipeáil sa stiúideo le Ray Manzarek na Doors agus tá blas an ‘Let Me Try’ (1969) iontach, sícideileach de chuid Kaleidescope agat.
Laigí?
Tá ‘Peacock’, mór-shingil an ghrúpa Splash! maoithneach go maith ach má thaitníonn ceol na stíle bubblegum a bhí in uachtar san Afraic Theas le linn na 80í leat ní chuirfidh sin meath ort. Ní hé ‘Highlife’ Gyedu Blay Ambolley an port is fearr de chuid an cheoltóra Ghánaigh. Níl gá le an ‘I Want To Be’ rómhilis de chuid Elias Rahbani.
An léirmheas?
Tá obair na gcapall déanta ag Buttle agus Stephens don tríú babhta as a chéile.
Tá Mr Bongo Record Club Volume 3 le fáil anois ar cheirníní Mr Bongo
