‘Ná creid daoine a chuirfeadh an dubh ina gheal ort i dtaobh na vacsaíne’
Fadó an lá bhíodh sé ina imní go mbeadh gasúir scriosta ag an raidió, nó ag an teilifís, nó ag cluichí ríomhaireachta nó ag an idirlíon. Feictear dom féin go bhfuil na gasúir ceart go leor agus go bhfuil inchinn na ndaoine fásta á scriosadh ag Facebook.
Is mar gheall ar Facebook agus na bréaga a scaipeadh air gur tharla vóta na Breatimeachta, gur cuireadh Donald Trump isteach sa Teach Bán, agus go gcreideann daoine ciallmhara go bhfuil ceallaí féatais sa vacsaín in aghaidh COVID-19.
Níl a fhios agam céard atá chomh deacair a thuiscint. Nó cén fáth a gceapann daoine go bhfuil fios níos fearr acu mar gheall ar rud a léigh siad ar Facebook, seachas saineolaithe, eolaithe agus dochtúirí a chaith a saol ag treabhadh gort tinnis agus víris éagsúla. Nuair atá idir 80-100 uair a chloig in aghaidh na seachtaine caite ag daoine ag obair in ospidéil, agus galair agus an bás feicthe acu le blianta agus nuair a deir na daoine céanna seo nach raibh tada ar bith beo níos deacra le déileáil leis ná COVID-19, ba cheart cluas a thabhairt dóibh.
Anois agus vacsaín againn, tá deis againn deireadh a chur leis an tinneas agus tá daoine ag scaipeadh bréag a facthas ar Facebook, in áit éisteacht le daoine a bhfuil scil acu san ábhar.
Ní saineolaí mise. Ach tá muinín agam as na saineolaithe. Tá duine as gach míle duine a tholg an galar th’éis bháis sa mBreatain. Tá na mílte ag fáil bháis leis chuile lá sna Stáit Aontaithe. Tá na mílte eile go dona tinn, gan trácht ar an bhail atá curtha ag an ngalar ar chúrsaí eacnamaíochta agus sóisialta. Caithfidh muid a bheith muiníneach as an vacsaín seo. Má tá drogall ort, tug chun cuimhne cuid de na fíricí seo.
1: Baineann fo-iarmhairtí le chuile dhruga beo ar an margadh. Tá iobúpróifein in ann poll a chur i do bholg agus i do chuid putóg, agus in ann deireadh a chur le do chuid duán. Fós, slogann muid iad uair ar bith a bhíonn cloigeann tinn againn. Níl aon druga gan riosca. Ach tá an baol an-bheag go deo. Tá sé níos lú arís leis an vacsaín seo. Is mó seans go mbeadh droch-thimpíste bóthair agat, ach níl aon dhrogall orainn bóthar a bhualadh.
2: Níor cíoradh aon vacsaín chomh dian agus an ceann seo. Glactar leis go mbeidh duine as chuile dheichniúr i bpian san áit a bhfuair siad an snáthaid, nó cloigeann tinn. Sin comhartha go bhfuil sé ag obair. Agus b’fhearr liom i bhfad géag tinn ar feadh dhá lá, ná coicís san ospidéal. Nó duine eile a chur den tsaol leis dá scaipfinn COVID19 i ngan a fhios dom féin.
3: Seachain nuacht Facebook. Chonaic mé ceann maith inné. Is cosúil go bhfuil VEID ar leath de dhaonra na Nua-Shéalainne. Agus é slogtha agus roinnte ag daoine éirimiúla. Seo fíric duit: chuile chúig nóiméad, buaileann taom croí nó stróc duine éicint in Éirinn nó sa mBreatain. Is mór an seans mar sin go gearr go mbeidh an vacsaín faighte ag créatúr éigin agus a bheidh básaithe an tráthnóna sin mar gheall ar a gcroí. Ní hin le rá gurbh é an vacsaín a rinne é. Ná creid daoine a dhéanfaidh iarracht an dubh a ina gheal ag rá go bhfuil an vacsaín ag marú daoine. COVID19 atá ag déanamh an slada.
4: Má tá ceist agat, lorg freagra. Ach ná téigh ar Facebook. Labhair leis an dochtúir, faigh eolas ón WHO nó áisíneachtaí nuachta ar féidir braith orthu.
