NÁ BAC – Físeán nua ceoil ó IMLÉ
Tá físeán nua ceoil eisithe ag an mbanna IMLÉ dá n-amhrán ‘Ná Bac’, a eisíodh den chéad uair ar albam début an bhanna in 2016. Labhair NÓS le Mc Muipéad, scríbhneoir an amhráin agus rapálaí IMLÉ, faoin bhfíseán nua.
“Chum mé ‘Ná Bac’ blianta fada ó shin, i bhfad sular tháinig IMLÉ ar an bhfód. Is cuimhin liom a bheith amuigh le mo chairde ag tús na 20idí, agus na liricí a bheith i mo chloigeann. Tá sé tar éis athrú thart ar cheithre nó chúig uaire le deich mbliana anuas. Tá an t-amhrán an-tábhachtach domsa mar is cur síos ar mo shaol mar leaid óg, sna déaga agus sna fichidí, atá ann agus anois is bailiúchán cuimhní den tréimhse sin é. Tá roinnt tagairtí ann d’eachtraí a tharla dom ag tús mo shaoil, agus an chaoi a raibh mé ag iarraidh gan a bheith in ísle brí.
“An rud is tábhachtaí a luaitear san amhrán ná an chéad phóg riamh i mo shaol! Bhí mé faoin mbord scoile, le mo chara Jenny Spain, le linn an ranga agus gan ach triúr againn sa rang. Ní dhéanfaidh mé dearmad faoi, mar ba í an chéad phóg a bhí agam ar ndóigh, ach mar gheall gur ith sí mála mór Taytos díreach sular phóg muid, agus mar bhí smaois lena shrón nuair a tharla sé. Ach ba í mo mhéit mór í,” a dúirt Mc Muipéad.
Taifeadadh an físeán ag an bPoll Beag i mBaile Átha Cliath, ina aice an tí solais ann. Ba mar gheall ar oidhreacht mhara Mc Muipéid, ar as Conamara ó dhúchas é, a roghnaíodh láthair an fhíseáin nua.
“Is é Fergal [ball eile IMLÉ] an duine is mó a d’oibrigh ar an bhfíseán, tá an bua sin aige agus tá ceamara maith aige. Roghnaigh muid an Poll Beag mar gheall ar an teach solais a bheith ann agus bheadh físeán ann an-éagsúil le físeáin eile a bhí againn. Bhí mise ag iarraidh go mbeadh an fharraige ann. Rinne an taifead thar dhá lá, agus más féidir liom rún a scaoileadh ní raibh mé ar an láthair an lá céanna a bhí na mná ann!” a dúirt sé.
Thug sé le fios freisin go bhfuil IMLÉ i mbun oibre arís agus amhráin á dtaifeadadh acu i láthair na huaire. Deir Mc Muipéad go bhfuil “50% den taifead déanta” agus go mbeidh na hamhráin nua á gcur amach “de réir a chéile” seachas ar albam nua.
“Tá sé amhrán againn agus beidh muid á gcur sin amach de réir a chéile. Ní fhanfaidh muid ar albam nua mar tá athrú tagtha ar an gcaoi a eisítear ceol sa lá atá inniu ann agus ba mhaith liom an stuif nua a roinnt lenár lucht leanúna in áit a bheith ag fanacht ar feadh dhá bhliain le ceol nua a chur amach. Beidh IMLÉ ag dul ar camchuairt in 2020.
