Bród! agus ceithre imeacht eile
Pop Up Gaeltacht, Corcaigh agus Kirkby Lonsdale – Dé hAoine 28 Meitheamh ’19
Má tá fonn óil agus ceoil oraibh i measc na nGael – tapaígí an deis a bheith ag an Pop Up Gaeltacht seo a leanas: Pop Up Gaeltacht, Fionbarra Bar, Sráid Dhúghlais, Co. Chorcaí, Dé hAoine 28 Meitheamh óna 20:00. Nó…níos faide i gcéin, i Kirkby, Lonsdale, beidh lucht labhartha na teanga i Sasana ag ócáid dá leithéid atá á heagrú ag Conradh na Gaeilge i London. Is mar chuid de Fhleadh Cheoil an cheantair atá sé seo eagraithe, agus gach eolas le fáil faoi ar an leathanach seo. Is i rith an lae, inniu Dé hAoine a bheidh sé seo ar siúl, óna 14:00.
Seoladh an albaim The Housekeepers, Tight Tábhairne The Crane, Dé hAoine 28 Meitheamh @ 20:30
Seolfar albam nua na beirte Doireann Glackin agus Sarah Flynn, anocht i gCathair na dTreabh.
The Housekeepers an teideal atá air, agus is sa Crane Bar a bheidh siad chuige sin agus iad i mbun an cheoil chomh maith in éineacht leis an ngiotáraí John Flynn. Seo saothar na beirte, a bhfuil tuairim is dhá bhliain caite acu ag plé leis agus taighde á dhéanamh acu ar cheol le cúigear ban — Ella Mae O’Dwyer, Nora Hurley, Aggie Whyte, Ellen Galvin agus Mollie Myers Murphy.
Tá meascán de cheol a bhíodh acu siúd thuasluaite sa trí rian déag atá ar an albam nua seo! Seoladh aréir, Déardaoin, é i dtigh tábhairne Matt Molloy’s i gCathair na Mart, agus mura n-éiríonn libh a bheith i láthair anocht sa Ghaillimh, cuimhnigh go mbeidh siad thiar arís i mí Iúil don bhFéile Traidphicnic, sa Spidéal ar an 6ú.
Bród! Club an Chonartha, 6 Sráid Fhearchair, Dé hAoine 28 Meitheamh @ 20:00
Beidh imeachtaí ar siúl timpeall na tíre ar fad an deireadh seachtaine seo ar mhaithe leis an bhféile Bród – paráidí, cainteanna agus imeachtaí sóisialta. Is i gClub an Chonartha a bheidh an gabhar á róstadh anocht, áit a mbeidh an Dr. Seán Mac Risteáird ag tabhairt cainte faoin teideal ‘An Crúsáil i saothar Mhichíl Uí Chonghaile’. Ina dhiaidh sin beidh seisiún a dhíreoidh ar mhalartú smaointe agus eolais, agus cloisfear dánta, amhráin agus físeáin bunaithe ar an téama mar chuid de sin. CeolBhiongó atá ar an ord reatha ag deireadh na hoíche agus is faoi Kev agus Sorcha atá sé, an bheirt a bheidh i bhfeighil an chúraim! Bí leo, saorchead isteach, óna hocht a chlog!
An Crann Óg, Amharclann Gaoth Dobhair, Dé Céadaoin 3 Iúil @ 19:30 (agus gach Céadaoin dála an scéil i rith an tsamhraidh)
Is breá liom ceol an ghrúpa, An Crann Óg! Cé go mbíonn na baill ag athrú ó am go ham, ní bhíonn caighdeán a gcuid ceoil. Is fiú a bheith ar an eolas faoi choirm sheachtainiúil a bhíonn ar siúl acu gach Céadaoin i nGaoth Dobhair. Is san Amharclann a bhíonn siad do sheisiún ceoil sheachtainiúil faoi stiúir Chaitlín Uí Dhuibhir. Costas ar an ndoras – €3, diail an mhargadh é! Amharclann.com do na mion sonraí ar fad!
Club Puball G, An Pharlús, Whelans, Dé Céadaoin 3 Iúil óna 19:30
Tá oíche thaitneamhach geallta i Whelan’s ar an gCéadaoin, mar go mbeidh Club Puball G ar bun. Seo tionscnaimh de chuid Rossa Uí Shnodaigh agus is é féin a bheidh mar fhear an tí don ócáid. I rith na hoíche beidh an fuirseoir Aideen McQueen, an banna Sisterix, agus na ceoltóirí Peadar Ó Goill, Aoife Kelly agus Aindrias de Staic le clos. Tá tacaíocht faighte ag an ócáid seo ó Ghlór na nGael agus ó Fhoras na Gaeilge. Sa Pharlús, i Whelan’s a bheith sé ar bun. Bí leo óna leathuair tar éis a seacht. I ndiaidh na n-imeachtaí beidh Dioscó Ciúin (silent disco) ar bun le beirt dhioscmharcach – is fútsa a roghnú an ceann is ansa leat agus cluas a thabhairt dá rogha siúd!
