Níos lú ná deich dticéad fágtha d’Fhéile na Gealaí
Tá níos lú ná deich dticéad campála ar fáil d’Fhéile na Gealaí a bheidh ag tosú i Ráth Chairn na mí amárach. Tá nach mór iomlán na dticéad campála díolta ag lucht eagraithe na féile agus deir siad nach mbeidh fáil ar thicéad campála ar an ngeata ar pháirc peile an bhaile Gaeltachta tráthnóna amárach.
Mura bhfuil ticéad campála ceannaithe go fóill ag duine ar mhaith leis freastal ar an bhféile cheoil is mó fás i saol na Gaeilge, ní mór dó dul ar Eventbrite inniu agus ceann de na ticéid dheireanacha a chinntiú dó féin.
Beidh ticéid lae ar díol ar an ngeata ag Féile na Gealaí i gcaitheamh an deireadh seachtaine do dhaoine nach mian leo a bheith ag campáil i Ráth Chairn.
Tá bus eagraithe ag Club Chonradh na Gaeilge arís i mbliana le lucht freastail na féile a thabhairt ó lár Bhaile Átha Cliath go Ráth Chairn Dé hAoine seo chugainn. Beidh an bus ag fágáil 6 Sráid Fhearchair ag 15.00 ar an 14 Meitheamh agus ag filleadh ó Ráth Chairn ag 15.00 ar an 16 Meitheamh. Cuireadh suíocháin bhreise ar fáil an tseachtain seo mar gheall ar an éileamh mór.
Tá fás mór tagtha ar an bhféile i mbliana agus trí láthair champála le bheith ann le hais aon cheann amháin sna blianta a d’imigh tharainn. Beidh láthair ar leith ann i mbliana ar pháirc peile Bhunscoil Uí Ghramhnaigh do theaghlaigh a bheidh ag freastal ar an bhféile, chomh maith le dhá láthair champála do ghnáthmhuintir na féile.
Beidh na láithreacha sin buailte ar láthair na féile ar pháirc CLG Clann na nGael i Ráth Chairn, cúpla nóiméad siúil ó lár an bhaile Gaeltachta. Is ar an bpríomhláthair seo a bheidh leithéidí Kneecap, An Chéad Ghlúin Eile, Bréag, Dáithí, Vigilanti, agus go leor leor eile nach iad. Is ann a bheidh na himeachtaí siamsaíochta ar nós ceardlanna damhsa, ióga, agus an ‘Rave Bricfeasta’ ar siúl freisin.
Ar Pháirc Chuimhneacháin Ráth Chairn, taobh le leabharlann an bhaile, beidh na himeachtaí teaghlaigh ar siúl. Beidh ceardlann agus seó puipeadóireachta á ndéanamh ag an gcomplacht Fíbín, agus beidh caisleán spraoi, cluichí, comórtais, péinteáil aghaidhe agus go leor eile ar siúl ann i gcaitheamh na féile.
