Hot House Flowers i dTrá Lí agus imeachtaí eile
The Hothouse Flowers, Sráid Deiní (mar chuid d’imeachtaí Fhéile na Rós), Trá Lí, Dé hAoine, 23 Lúnasa @ 21:30
An bhfaca tú The Hothouse Flowers le déanaí ag an bhFleadh Cheoil? Nach acu a bhí an ceol agus leagan den amhrán Sí do Mhamó Í go bríomhar acu dúinn! Beidh deis arís eile agat an banna seanbhunaithe seo óna gcuid laethanta scoile i gColáiste Eoin a fheiscint ag ócáid saor in aisce i dTrá Lí na Ríochta. Tá Féile na Rós ar lic an dorais againn agus mar chuid den gclár tá go leor imeachtaí (gan aon chostas orthu) beartaithe. Ina measc, ceolchoirm le The Hothouse Flowers, a bheidh ar siúl ar Shráid Deiní Dé hAoine beag seo.
McNamee’s, Baile Locha Riach, Co. na Gaillimhe, Dé Sathairn, 24 Lúnasa @ 20:00
Pop Up Gaeltacht, Tábhairne Dice, Margadh na Feirme, Déardaoin, 29 Lúnasa @ 20:00
Mar is iondúil, uair sa mhí, roghnaítear tigh tábhairne agus buaileann dream daoine le chéile ann a bhfuil suim acu sa Ghaeilge. Déanfar amhlaidh arís, ar an Déardaoin deireanach den mhí seo agus Margadh na Feirme roghnaithe mar láthair na hócáide. Is i dtábhairne Dice Bar, taobh leis an Luas, a bheidh an teacht le chéile. N’fheadar fútsa, ach táimse ag tnúth go mór leis.
Mura féidir leat fanacht go dtí sin, bí ar an eolas go mbeidh a leithéid d’oíche ar siúl in Oirthear na Gaillimhe Dé Sathairn, eagraithe ag an grúpa Gaeilge Locha Riach. Fan go gcloisfidh tú – beidh duaiseanna ar fáil dóibh siúd a chuireann a gcuid Gaeilge chun cinn i rith na hoíche! Cúis mhaith eile le freastal air!
Músaem an Fheirtéaraigh, Baile an Fheirtéaraigh, Dé Domhnaigh, 25 Lúnasa @ 10:00
Tá an tSeachtain Oidhreachta Náisiúnta faoi lán seoil! Cuireadh tús leis an Satharn seo caite, agus mairfidh sé go dtí deireadh an deiridh seachtaine! Tá Músaem beag álainn i mBaile an Fheirtéaraigh, i gCorca Dhuibhne agus scaoilfear isteach thú, gan táille a íoc, Dé Domhnaigh beag seo. Ní hamháin go bhfuil iarsmaí luachmhara ann, ach tá siopa leabhar deas ar an láthair áit a ndíolann siad leabhair agus táirgí ceardaíochta; chomh maith le caifé beag, áit a bhfaighidh tú cístí, scónaí agus ábhar eile bácála! Nium!
Dysania, The Workman’s Club, Cé Wellington, Baile Átha Cliath, Dé Céadaoin, 28 Lúnasa @ 20:30
Bhíos ag trácht ar an mbanna ceoil Dysania ar an leathanach seo an tseachtain seo caite, agus Liú Lúnasa faoi chaibidil agam. Ná dearúd go mbeidh siad i measc na mbannaí a bheidh ag Ceolchoirm Laochra Liú Dé Sathairn beag seo, agus ina dteannta beidh DJanna na féile, Tadhg & Geal, Emma Ní Fhíoruisce agus J.J. Ó Dochartaigh.
Bí ar an eolas chomh maith áfach, go mbeidh siad le feiscint sa Workman’s Club ar an gCéadaoin beag seo chomh maith, áit a mbeidh siad ag seinnt cuid dá saothar nua. Bog Rock do na Gaeil atá scaipthe ar fud an domhain a thugann siad ar an stíl atá acu… meascán de cheol ó uirlisí punc-rac agus uirlisí traidisiúnta fite fuaite lena chéile. Cúig euro costas na dticéad, agus trí euro dóibh siúd atá dífhostaithe!
