Beidh Seán Ó Méalóid, an chéad tuairisceoir ar an láthair ag RTÉ nuair a cuireadh tús le leagan Balla Berlin, le feiceáil sa chathair sin arís nuair a chraolfar anocht an clár faisnéise Ar ais go Berlin ’89 ar RTÉ 1.
Ar an 9 Samhain 1989 a leagadh Balla Bheirlín agus bhí Seán Ó Méalóid ag tuairisciú ón láthair don chlár Gaeilge Cúrsaí.
Ag labhairt dó le Tuairisc.ie, dúirt láithreoir Ar ais go Berlin ’89 go raibh áthas air an deis a fháil filleadh ar Bheirlín chun comóradh a dhéanamh ar mhórimeachtaí 1989.
“Nuair a thit Balla Berlin 30 bliain ó shin, bhí sé ar cheann de na heachtraí ba shuntasaí agus ba thaibhsiúla i stair an fichiú haois.
“Bhí an t-ádh dearg orm a bheith i láthair agus Balla Berlin, siombail an Chuirtín Iarainn, á leagan. Ba chosúil ag an am go raibh an Cogadh Fuar thart agus go raibh bagairt an chogaidh núicléach imithe i léig,” a dúirt Ó Méalóid.
Tabharfar léargas sa chlár ar an tslí a ndeachaigh an eachtra stairiúil i bhfeidhm ar mhuintir Bheirlín agus ar an domhan mór.
Ba i dteannta fhoireann scannánaíochta Cúrsaí a bhí Seán Ó Méalóid i 1989 ach 30 bliain níos déanaí is lena neacht, Nóra Jane, nach raibh ar an saol tráth ar leagadh an balla, a thugann sé faoin turas céanna.
Deir sé go bhfuil an chuid sin de chathair Berlin a bhí taobh leis an mBalla “glan ó aithne anois” mar gur thapaigh muintir na cathrach gach deis chun lorg an uafáis a ghlanadh as an áit agus gur mhór aige an deis cuid den stair a mhíniú dá neacht.
“Bhí mé ag iarraidh rian éigin den atmaisféar a bhlais mise ag Balla Berlin i 1989 a léiriú di, agus na heachtraí stairiúla a bhí ag titim amach ag an am a mhíniú di.”
– Craolfar anocht ar RTÉ 1 ag 10.15pm Ar ais go Berlin ’89
