An tríú leabhar i sraith ‘An Litir’ ar fáil le réamhordú anois
Tá fógartha ag Leabhar Breac go mbeidh an tríú leabhar i dtríológ Lúcáis Uí Bhriain ar fáil go han-luath do lucht leanta na sraithe. Tugadh moladh mór don chéad leabhar sa tsraith eachtraíochta ó pheann Liam Mhic Cóil, An Litir, nuair a chéadfhoilsíodh in 2011 é, agus bhí an-tóir freisin ar an leabhar leanta I dTír Strainséartha a tháinig amach in 2014.
Fanacht fhada fhuar a bhí ar leantóirí na sraithe ar feadh sé bliana ina dhiaidh sin, ach is féidir ordú a chur isteach ar Bealach na Spáinneach anois ar shuíomh an fhoilsitheora, Leabhar Breac. Costas €15 a bheidh ar an leabhar sna siopaí ach tá sé ar fáil ar €12 ar an suíomh faoi láthair.
Cuirfear críoch le heachtra Lúcáis Uí Bhriain san oll-leabhar seo, atá beagnach dhá oiread níos faide ná an dara leabhar sa tríológ agus beagnach trí oiread níos faide ná an chéad leabhar. Lonnaithe in Éirinn agus ar an Mór-Roinn le linn na mblianta corraitheacha tar éis Imeacht na nIarlaí, leanfaidh an leabhar Lúcás ar an gcuid dheireanach dá thuras an litir a tugadh dó i nGaillimh in Earrach na bliana 2012 a leagan i láimh Aodha Mhóir Uí Néill, taoiseach agus Iarla Thír Eoghain.
Léigh Liam Mac Cóil sliocht as an leabhar nua ag Oireachtas na Samhna anuraidh in Óstán an CityWest.
