Titim mhór ar éifeacht an fheachtais #TrasnanadTonnta i mbliana

Bhí laghdú os cionn 80% ar líon na ngiolcacha a seoladh le linn an fheachtais Twitter #TrasnanadTonnta i mbliana, de réir anailís atá déanta ag an Ollamh Kevin Scannell. Seoladh thart ar 10,700 giolc faoin haischlib #trasnanadtonnta an bhliain seo caite, ach seoladh níos lú ná 2,000 le linn an fheachtais i mbliana.

Níor ghlac ach 443 cuntas uathúil Twitter páirt san fheachtas in 2020, le hais an 2,569 cuntas uathúil a bhí ag giolcaireacht as Gaeilge in 2019. 

Ba dhaoine nár sheol giolc as Gaeilge riamh cheana 43% de na 443 cuntais sin, rud a léiríonn gur éirigh leis an bhfeachtas daoine nach bhfuil gníomhach sa nGaeltacht Dhigiteach a mhealladh chun na teanga. 

Anuraidh, ba chuntais a bhain le daoine aonair den chuid ba mhó a bhí gníomhach san fheachtas, agus gan ach eagraíocht amháin i measc na ndeich gcuntas ba mhó a ghlac páirt ann. Níorbh amhlaidh an scéal i mbliana, áfach, agus cuntas oifigiúil an fheachtais, @trasna20, ar bharr an liosta agus triúr atá ag obair leis na heagraíochtaí a eagraíonn an feachtas, @iansmith221 @Seo_Deann agus @PaulaMelvin, ar an liosta freisin. 

Ba ghiolc ón gcuntas @trasna20 féin ag tús an fheachtais an giolc ba mhó a mheall aird lucht Twitter. 

Bhí an Seanadóir nuathofa, Seán Kyne, a bhí ina Aire Stáit Gaeltachta sa rialtas deireanach, gníomhach le linn na seachtaine freisin agus a ghiolc féin ar an dara giolc is mó a chuaigh i bhfeidhm ar dhaoine. 

Dúirt urlabhraí ón bhfeachtas #TrasnanadTonnta le NÓS gur thuig lucht a stiúrtha go mbeadh laghdú ar an idirghníomhaíocht i mbliana ar chúpla cúis ach go raibh “rud mór” beartaithe ag lucht #TrasnanadTonnta níos deireanaí i mbliana. 

Cuireadh tús le #TrasnanadTonnta trí bliana ó shin le cainteoirí Gaeilge ar fud na cruinne a nascadh le chéile ar na meáin shóisialta.

Níos mó