Imreofar cluichí ceannais na hÉireann sa pheil agus san iomáint mí na Nollag agus tá na socruithe do chraobhacha sinsir peile agus iomána na hÉireann 2020 fógartha ag Cumann Lúthchleas Gael tráthnóna.
Imreofar cluiche ceannais na craoibhe sinsir iomána Dé Domhnaigh an 13 Nollaig agus imreofar cluiche ceannais Chorn Sheosaimh Mhic Dhonncha an lá céanna.
Beidh an cluiche ceannais peile ann sé lá ina dhiaidh sin, Dé Sathairn, an 19 Nollaig.
Tá sé fógartha ag CLG chomh maith nach mbeidh craobhacha na gcúigí ná craobhacha na hÉireann ann i gcomórtais na gclubanna i mbliana agus cinneadh déanta an séasúr uile a chríochnú roimh dheireadh na bliana.
Tá faighte réidh le babhtaí na ngrúpaí a bhí i bhfeidhm sna comórtais idirchontae le cúpla bliain anuas agus laghdú tagtha ar líon na gcluichí atá le himirt de bharr na srianta atá curtha ag Covid-19 ar na craobhacha.
Den chéad uair ó 1999, ní bheidh aon chúldoras i bhfeidhm i gCraobh Shinsir Peile na hÉireann. Ní bheidh Comórtas an tSár-Ochtair ann ar chor ar bith i mbliana ach oiread agus díbreofar foirne ón gcraobh nuair a chailleann siad a gcéad chluiche. Ní gá do CLG tarraingt nua a dhéanamh don chraobh.
Fágann sé sin go ndíbreofar roinnt foirne luath sa chomórtas. Tá Tír Eoghain agus Dún na nGall chun aghaidh a thabhairt ar a chéile i mbabhta ceathrú ceannais Uladh agus casfaidh Corcaigh agus Ciarraí ar a chéile i gcluiche leathcheannais na Mumhan. Ní fheicfear na foirne a chailleann na cluichí sin arís sa chraobh.
Ní ghlacfaidh Nua-Eabhrac páirt sa chraobh i mbliana agus beidh le feiceáil an mbeidh Londain in ann imirt inti.
Deimhníodh go bhfuil Corn Tailteann curtha siar go dtí 2021 chomh maith.
Imreofar cluiche ceannais peile Laighean Dé Sathairn, an 21 Samhain, mar chuid de chomóradh céad bliain Dhomhnach na Fola i bPáirc an Chrócaigh.
Tabharfar an dara deis d’fhoirne sa chraobh iomána agus an comórtas leagtha amach mar a bhí sé in 2018 den chuid is mó.
Ní bheidh aon ghrúpaí i gceist i gCraobh Laighean ná i gCraobh na Mumhan agus beidh tarraingt nua ann anocht chun na cluichí a shocrú.
Tabharfar cead ar aghaidh do Loch Garman agus do Chill Chainnigh go dtí na babhtaí leathcheannais i gCraobh Laighean tar éis dóibh an cluiche ceannais a bhaint amach anuraidh.
Rachaidh na foirne a bhuafaidh craobhacha na gcúigí ar aghaidh go dtí babhtaí leathcheannais na hÉireann mar is gnáth agus rachaidh na foirne eile isteach sna babhtaí cáilithe.
Ní bheidh aon chluichí athimeartha ann sa chraobh iomána ná sa chraobh peile.
Tá sé i gceist ag CLG deireadh a chur leis an tSraith Náisiúnta peile chomh maith agus dhá bhabhta fágtha. Imreofar Babhta 6 den tsraith Dé Domhnaigh an 18 Deireadh Fómhair agus beidh Babhta 7 ann an deireadh seachtaine dár gcionn. Ní imreofar aon chluichí ceannais, áfach.
