Iarrtha ag ollamh ollscoile an focal Gaelach ‘Clann’ a bhaint as ainm fhoireann an choláiste
Tá léachtóir in Ollscoil Simon Fraser (SFU) in British Colombia i gCeanada tar éis achainí a thosú ina n-iarrtar ar lucht riartha an choláiste ainm fhoireann an choláiste, The Clan, a athrú ar fhaitíos go bhfeicfeadh imreoirí ó Stáit Aontaithe Mheiriceá masla ann, agus go gcuirfidh mic léinn SFU i mbaol.
Taiscéalaí de shliocht na hAlban a bhí in Simon Fraser, as ar ainmníodh an ollscoil taobh amuigh de chathair Vancouver. Ba mar gheall ar an oidhreacht Ghaelach sin, agus in ómós Chlann Fhriseal, a tugadh The Clansmen ar fhoirne spóirt na hollscoile.
Mar gheall go mbíonn foirne na hollscoile ag imirt i Roinn II de chluichí an NCAA (Cumann Náisiúnta Lúthchleasaíocht na gColáistí), bíonn orthu taisteal ó dheas go Stáit Aontaithe Mheiriceá go rialta. Beidh an fhoireann peile ag imirt in Washington, Oregon agus in California an séasúr seo, agus tá imní ar ollamh le fealsúnacht san ollscoil go gcuirfeadh an t-ainm ‘The Clan’ isteach ar imreoirí sna háiteanna sin.
Dúirt an tOllamh Holly Anderson go raibh an baol ann go samhlódh muintir Mheiriceá The Ku Klux Klan leis an ainm The Clan. Mhaígh sí go gcuireann an t-ainm isteach ar chéilithe comhraic na foirne agus go bhfágann sé “i bponc” iad.
Thug an tOllamh Anderson le fios freisin go bhféadfadh sé go gcuirfí na lúthchleasaithe as British Colombia i mbaol mar gheall ar an gcaoi a bhfuil cúrsaí sna Stáit Aontaithe faoi láthair.
“Tá mé ag ceapadh go bhfuil sé rud beag contúirteach dá lúthchleasaithe agus mic léinn mar gheall ar chúrsaí reatha sna Stáit Aontaithe. Chuirfeadh sé uafás ar dhuine an líon ollscoileanna a thug rialacha isteach lena ligtear do mhic léinn gunnaí láimhe a iompar, agus scaití clúdaítear gunnaí faoi cheilt sna rialacha.
“Tá go leor de na coláistí seo i stáit a bhfuil dlíthe ‘Seas an Fód’, nó dlíthe mar iad, i bhfeidhm. Sa chás sin, má mhaíonn duine gur bhraith sé go raibh a bheatha i mbaol — cuirim i gcás dá dtosódh sé troid leat agus dá dtarraingeofá féin dorn air — tá an ceart dlí aige thú a scaoileadh,” a dúirt sí.
Dúirt sí go bhfuil na coláistí sin “ar tinneall” agus nach gcabhródh “ainm gríosaitheach” leis na mic léinn.
“Féadfaimid ainm nua iontach a roghnú anois sula mbeidh trioblóid ann, in áit a bheith ag fanacht go dtí go mbeidh eachtra éigin nó tragóid ann. Tá an méid sin tuillte ag na mic léinn atá linn faoi láthair agus ag na mic léinn a bheidh linn amach anseo,” a dúirt sí.
Tá os cionn 700 duine tar éis a n-ainm a chur leis an achainí ar líne cheana féin.
