Tá 242 cás nua den Covid-19 fógartha ag an Roinn Sláinte tráthnóna.
Ní raibh bás ar bith eile de dheasca an ghalair le fógairt acu don dara lá as a chéile.
16 duine a raibh an galar tolgtha acu a bhásaigh go dtí seo i mí na Nollag. 147 a bhásaigh ón ngalar mí na Samhna agus 120 duine a bhí i gceist mí Dheireadh Fómhair.
223 othar a bhfuil an Covid-19 orthu atá sna hospidéil agus tá 28 acusan in aonad dianchúraim.
Bhain 27 de chásanna nua an lae inniu le Dún na nGall, 16 cás a bhí i nGaillimh, 13 cás i bPort Láirge, 10 gcás a bhí i gCorcaigh agus naoi gcás a bhí i Maigh Eo. Níos lú ná cúig chás a bhí i gcontae na Mí agus ní raibh aon chás nua den Covid-19 le fógairt i gCiarraí inniu.
Bhain 76 de 242 cás an lae inniu le Baile Átha Cliath.
Is in Éirinn anois atá an ráta coicíse is ísle san Aontas Eorpach – 80.4 cás in aghaidh gach 100,000 duine.
Is i nDún na nGall go fóill atá an ráta coicíse is airde sa stát agus ráta 232 i gceist sa chontae sin. Deimhníodh 370 cás nua i nDún na nGall le coicís anuas.
Tá na contaetha Gaeltachta eile uile faoi bhun an mheánráta náisiúnta. Ráta 74 atá i Maigh Eo, 73 atá i bPort Láirge agus 55 atá i nGaillimh. Ráta 50 atá i gcontae na Mí, 35 atá i gCorcaigh agus 29 atá i gCiarraí.
D’fhógair Roinn Sláinte an Tuaiscirt níos túisce inniu go raibh naonúr eile a raibh an coróinvíreas tolgtha acu básaithe. 397 cás nua a bhí le fógairt acu tráthnóna.
386 othar a bhfuil an Covid-19 orthu atá in ospidéil an Tuaiscirt agus 29 díobhsan atá in aonad dianchúraim. Bhí 99% de na leapacha ansin lán inniu.
3,158 duine atá básaithe in Éirinn go dtí seo de dheasca na paindéime, 2,099 duine ó dheas den teorainn agus 1,059 duine ó thuaidh di.
125,009 cás a deimhníodh in Éirinn go nuige seo, 74,468 cás ó dheas agus 129, 912 ó thuaidh.
