Tá 270 cás nua den Covid-19 deimhnithe ag an Roinn Sláinte inniu. Cúigear eile a raibh an galar orthu atá básaithe.
Dúirt an Príomhoifigeach Leighis an Dr Tony Holohan gur in Éirinn atá an ráta coicíse is ísle san Aontas Eorpach, ach dúirt sé nár mhór dúinn “an fód a sheasamh” agus gan “na maidí a ligean le sruth”.
“Nuair a thagann tú abhaile ó bheith ag siopadóireacht nó taobh amuigh, cuimhnigh gurb é an chéad rud a chaithfidh tú a dhéanamh ná do lámha a ní,” a dúirt sé.
Bhain 38 den 270 cás nua le Dún na nGall, níos mó ná aon chontae eile seachas Baile Átha Cliath. Bhain 25 eile de chásanna an lae inniu le Maigh Eo, seacht gcás a bhí i gCorcaigh, sé chás a bhí i gcontae na Mí agus cúig chás a bhí i nGaillimh. Níos lú ná cúig chás a bhí i bPort Láirge agus níos lú ná cúig cinn a bhí i gCiarraí.
231 othar a bhfuil an Covid-19 orthu atá sna hospidéil agus tá 31 acusan in aonad dianchúraim.
84.7 an ráta coicíse den ghalar in aghaidh gach 100,000 duine.
Tá an ráta is airde sa tír fós i nDún na nGall – 212. Tá an ráta i Maigh Eo imithe suas go dtí 97, 75 a bhí i bPort Láirge agus 67 a bhí i gcontae na Mí. Ráta 60 a bhí i gCorcaigh, 47 a bhí i nGaillimh agus 39 a bhí i gCiarraí.
Dúirt an tAire Sláinte Stephen Donnelly inniu go bhféadfadh go dtosófaí ar vacsaín Pfizer/BioNTech a thabhairt do dhaoine mí Eanáir.
Dúirt Donnelly go gcuirfeadh an Ghníomhaireacht Leigheasra Eorpach (EMA) deireadh leis an scagadh atá á dhéanamh acu ar an vacsaín ar an 29 Nollaig.
Má thugann an EMA a mbeannacht don vacsaín d’fhéadfadh go mbeadh an chéad bhaisc réidh le dáileadh sa stát luath mí Eanáir, a dúirt an tAire Sláinte. Dúirt sé go ndéanfaí cinneadh faoi vacsaín Moderna ar an 12 Eanáir. Chinn an Rialtas an tseachtain seo go gceannófaí 850,000 dáileog de vacsaín Moderna.
Dúirt an Taoiseach go raibh dul chun cinn “an-tapa” á dhéanamh ag an tascfhórsa a bunaíodh chun straitéis vacsaínithe an stáit a láimhseáil.
Bhí bulc-choimeádáin faighte cheana féin chun an vacsaín a iompar ag teocht an-íseal, a dúirt an Taoiseach.
D’fhógair Roinn Sláinte an Tuaiscirt go raibh 416 cás nua den choróinvíreas deimhnithe acu agus go raibh ceathrar eile básaithe de dheasca an ghalair.
435 othar Covid-19 atá sna hospidéil i Tuaisceart Éireann agus tá 37 díobhsan in aonad dianchúraim.
3,089 duine atá básaithe in Éirinn go dtí seo de dheasca na paindéime, 2,074 duine ó dheas den teorainn agus 1,015 duine ó thuaidh di.
126,336 cás a deimhníodh in Éirinn go nuige seo, 73,066 cás ó dheas agus 53,272 ó thuaidh.
D’fhéadfadh gur an tseachtain seo chugainn a thosófar ar vacsaín in aghaidh an Covid-19 a thabhairt do mhuintir an Tuaiscirt.
Tá an Ríocht Aontaithe ar an gcéad áit ar domhan le mórdháileadh na vacsaíne Pfizer/BioNTech a cheadú agus dúirt Aire Sláinte an Tuaiscirt Robin Swann gur “lá mór” a bhí ann.
Dúirt Céad-Aire Thuaisceart Éireann Arlene Foster gur “bronntanas Nollag luath” a bhí sa vacsaín. Dúirt an LeasChéad-Aire Michelle O’Neill go ndéanfadh an vacsaín “athrú ó bhonn” ar chúrsaí.
Dúirt Robin Swann go rabhthas ag súil leis an chéad bhaisc den vacsaín roinnt laethanta níos luaithe ná mar a bhí beartaithe.
Dúirt sé gur 25,000 dáileog den vacsaín a bheadh le fáil sa chéad bhaisc. 1.5 milliún dáileog ar fad atá le fáil ag Roinn Sláinte an Tuaiscirt.
Thug rialálaí leighis na Ríochta Aontaithe a bheannacht don vacsaín, a mhaítear a thugann cosaint 95% do dhaoine, agus dúradh go raibh sé sábháilte tosú á dáileadh.
Tabharfar an vacsaín i dtosach do dhaoine in ionaid chúraim agus do dhaoine níos sine agus a gcúramóirí.
Ina dhiaidh sin tabharfar an vacsaín do dhaoine os cionn 80 bliain d’aois agus d’oibrithe sláinte agus sóisialta tús líne.
Ó tharla gur gá vacsaín Pfizer a stóráil ag teocht an-íseal agus go dtagann sé i mbeart mór, socraíodh go dtabharfar daoine go dtí ionaid mhóra chun í a fháil. Seacht n-ionad ar fad a bheidh i gceist.
