Tá sé fógartha ag an Roinn Sláinte tráthnóna go bhfuil 54 duine eile básaithe de dheasca an choróinvíris. Is i mí Eanáir a bhásaigh leathchéad de na daoine sin.
Deimhníodh 1,335 cás nua den ghalar.
1,670 duine a bhfuil an coróinvíreas orthu a bhí sna hospidéil tráthnóna agus bhí 217 acusan in aonad dianchúraim.
Cé go bhfuil laghdú leanúnach ag teacht ar ráta coicíse an ghalair – 674 – deir an Príomhoifigeach Leighis, an Dr Tony Holohan, go bhfuil an ráta fós dhá oiread níos airde ná mar a bhí nuair a bhí Leibhéal 5 i bhfeidhm cheana mí Dheireadh Fómhair.
Dúirt an Dr Holohan “nach é seo tráth an neamhairdill”.
“Tá an baol tolgtha fós an-ard sa phobal. Caithfimid leanúint orainn chun líon na gcásanna a laghdú agus tuilleadh daoine a choinneáil ón ospidéal agus ón mbás.”
Bhain 114 de chásanna nua an lae inniu le Corcaigh, bhain 78 cás le Gaillimh agus bhí 71 cás i gcontae na Mí. 49 cás nua a bhí i bPort Láirge, 48 cás a bhí i nDún na nGall, 34 cás a bhí i Maigh Eo agus bhí 14 cás i gCiarraí.
Bhain 437 den 1,335 cás inniu le Baile Átha Cliath.
Tá ráta coicíse an ghalair tite go dtí 674.2 cás in aghaidh gach 100,000 duine sa stát.
Ráta 886 a bhí i bPort Láirge, 757 a bhí i Maigh Eo, 702 a bhí i gcontae na Mí agus 656 a bhí i nDún na nGall. Ráta 635 a bhí i gCorcaigh, 574 a bhí i nGaillimh agus 347 a bhí i gCiarraí – an tríú ráta coicíse is ísle den ghalar sa stát.
De réir na bhfigiúirí is déanaí ó Roinn Sláinte an Tuaiscirt tá 16 duine eile a raibh an galar orthu básaithe. 527 cás nua a deimhníodh.
Tá 775 othar san ospidéal agus an Covid-19 orthu agus 68 acusan in aonad dianchúraim.
293,000 cás a deimhníodh in Éirinn go nuige seo, 191,182 cás ó dheas den teorainn agus 101,818 cás ó thuaidh di.
4,899 duine atá básaithe in Éirinn go dtí seo de dheasca na paindéime, 3,120 duine ó dheas den teorainn agus 1,779 duine ó thuaidh di.
