Tá 13 duine eile a raibh an Covid-19 orthu básaithe, de réir na bhfigiúirí is déanaí ón Roinn Sláinte. 371 cás nua den ghalar a fógraíodh tráthnóna.
Bhásaigh triúr den 13 duine an mhí seo, bhásaigh triúr eile an mhí seo caite agus is i mí Feabhra nó roimhe sin a bhásaigh an seachtar eile.
153 othar Covid-19 a bhí sna hospidéil ar maidin agus bhí 45 díobhsan in aonad dianchúraim.
Tá an chéad dáileog den vacsaín faighte ag 1,014,640 duine agus an dara dáileog faighte ag 403,302 duine.
Bhain 33 den 371 cás nua den Covid-19 a fógraíodh inniu le Dún na nGall.
Ní raibh cás ar bith le fógairt i gCiarraí den dara lá as a chéile agus ní raibh aon chás nua i Maigh Eo ach an oiread.
18 cás a bhain le Corcaigh, 17 cás a bhí i gcontae na Mí, 11 cás a bhí i bPort Láirge agus deich gcás a bhí i nGaillimh.
Meánráta 121 cás in aghaidh gach 100,000 duine sa stát a bhí ann le coicís anuas. Ráta 288 atá i nDún na nGall, an ráta is airde sa tír, agus tá an ráta i gcontae na Mí, 151, níos airde ná an meánráta náisiúnta freisin.
Ráta 82 atá i nGaillimh, 70 atá i Maigh Eo agus 70 atá i bPort Láirge. Ráta 43 atá i gCorcaigh agus 20 atá i gCiarraí, an ráta is ísle sa tír.
D’fhógair Roinn Sláinte Thuaisceart Éireann inniu go raibh duine amháin eile básaithe ansin de dheasca an víris. 98 cás nua a deimhníodh ansin.
60 othar Covid-19 atá in ospidéil an Tuaiscirt agus tá ochtar acusan in aonad dianchúraim.
Tá an chéad dáileog den vacsaín faighte ag 927,656 duine sa Tuaisceart agus tá an dara dáileog faighte ag 367,469.
7,038 duine atá básaithe in Éirinn go dtí seo de dheasca na paindéime, 2,144 duine ó thuaidh den teorainn agus 4,896 duine ó dheas di.
367,843 cás a deimhníodh go nuige seo in Éirinn, 247,857 cás ó dheas den teorainn agus 119,986 cás ó thuaidh di.
Ag cruinniú Rialtais amárach a shocrófar maolú na srianta sa mBealtaine agus athoscailt ghnóthaí na tíre sa Mheitheamh agus i mí Iúil. Tuairiscítear gur dócha go dtabharfar cead oscailte do na siopaí ar fad sa mBealtaine ach ní cheadófar ar dtús ach an tseirbhís cliceáil agus bailigh.
Táthar ag súil go mbeidh gruaigeadóirí agus earnáil na tógála ar fad ar ais roimh dheireadh na Bealtaine chomh maith le traenáil faoin aer d’fhoirne spóirt.
An chéad mhí eile freisin a cheadófar suas le 50 duine ag seirbhís eaglasta ach níl aon athrú i gceist fós ar an 25 atá ceadaithe ag sochraid nó pósadh. Má bhíonn cead do chontae féin a fhágáil ar mhaithe le turas a dhéanamh, is maith an seans go mbeidh cead ag óstáin agus tithe lóistín oscailt sa Mheitheamh, tráth a mbeidh cead bia a chur ar fáil amuigh faoin aer faoi phlean reatha an Rialtais.
