Tá figiúirí féachana curtha ar fáil ag RTÉ don chlár nuachta as Gaeilge a théann amach ar RTÉ 1 tráthnóna in ainneoin nach raibh TG4 sásta a macasamhail d’fhigiúirí do Nuacht TG4 a chur ar fáil.
Is iad RTÉ a dhéanann an dá chlár, Nuacht RTÉ agus Nuacht TG4, a chraoltar gach lá ar RTÉ agus TG4 faoi seach, ach ní raibh ceachtar den dá stáisiún sásta na figiúirí féachana do Nuacht TG4 a chur ar fáil.
Thug RTÉ le fios do Tuairisc cheana gur cheist do TG4 ab ea figiúirí féachana Nuacht TG4 a chur ar fáil, cé gurb iad RTÉ a dhéanann an clár agus cé go gcraoltar é freisin ar an gcainéal RTÉ News.
Nuair a lorg Tuairisc figiúirí féachana do Nuacht TG4, dhiúltaigh TG4 na figiúirí sin a chur ar fáil.
Rinne Tuairisc iarratas ar na figiúirí faoin Acht um Shaoráil Faisnéise ina dhiaidh sin ach dhiúltaigh TG4 don iarratas sin chomh maith.
Rinne Tuairisc achomharc faoin gcinneadh sin leis an gCoimisinéir Faisnéise, a chinn go raibh sé de cheart ag TG4 na figiúirí féachana a choimeád faoi rún.
Chuir RTÉ na figiúirí féachana do Nuacht RTÉ ar fáil nuair a cuireadh gnáth-iarratas preasa faoina mbráid á lorg.
67,000 duine ar an meán a d’fhéach ar Nuacht RTÉ gach oíche idir an 3-9 Aibreán 2022. Bhí an lucht féachana is mó ag na heagráin a craoladh tráthnóntaí Dé Luain agus Dé Céadaoin an tseachtain sin, nuair a bhí lucht féachana 87,000 ag an dá chlár.
Tráthnóna Dé Domhnaigh ba lú an lucht féachana nuair a d’fhéach 53,000 duine ar Nuacht RTÉ.
Níl an lucht féachana a d’fhéach ar Nuacht RTÉ ar an RTÉ Player ná ar an gcainéal RTÉ News san áireamh sna figiúirí sin.
Dhiúltaigh TG4 d’iarratas a rinneadh ar fhigiúirí Nuacht TG4 ar chúiseanna éagsúla, ina measc rúndacht an eolais agus an baol go ndéanfaí dochar, mar shampla, do chaidreamh foirne dá gcuirfí na figiúirí ar fáil.
Dúirt TG4 chomh maith nár mhian leo na figiúirí féachana do Nuacht TG4 ná do 7Lá a chur ar fáil do Tuairisc ná do mheáin eile toisc nach iad féin a shocródh “an comhthéacs” ina gcuirfí na figiúirí sin ar fáil.
Dúradh freisin gur bhain na figiúirí féachana le próiseas eagarthóireachta na gclár.
Ghlac an Coimisinéir Faisnéise leis an maíomh áirithe sin agus chinn sé nach bhfuil aon dualgas de réir dlí ar TG4 na figiúirí féachana a chur ar fáil.
Chuir RTÉ figiúirí féachana do Nuacht TG4 ar fáil do Tuairisc cheana faoin Acht um Shaoráil Faisnéise. Idir 5,600 agus 10,100 duine ar an meán a d’fhéach ar Nuacht TG4 ó Feabhra go Bealtaine 2018, de réir na bhfigiúirí sin.
