Gearrliostaí do Ghradaim Leabhar na Bliana fógartha ag an Oireachtas
Tá 16 leabhar ainmnithe i dtrí rannóg do ghradaim agus Gradaim Foilsitheoireachta an Oireachtais 2022. Fógraíodh na leabhair atá ainmnithe do Ghradam Uí Shúilleabháin, Gradam Réics Carló, agus Gradaim de Bhaldraithe inné.
Tá scríbhneoir de chuid na hirise seo, Seaghan Mac an tSionnaigh, ainmnithe do Ghradam de Bhaldraithe dá aistriúchán ar An Triúr Triallach: An Congó le René Goscinny augs Alberto Uderzo – greannán Gearmánach a céadfhoilsíodh in 1976.
Sé leabhar atá ainmnithe do Ghradam Uí Shúilleabháin, a bhronntar ar an leabhar is fearr do dhaoine fásta; cúig leabhar atá ainmnithe do Ghradam Réics Carló, a bhronntar ar an leabhar is fearr do pháistí; agus cúig leabhar atá ainmnithe do Ghradam de Bhaldraithe, a bhronntar ar an aistriúchán is fearr go Gaeilge.
Bronnfar €2,500 ar údar an tsaothair a thabharfaidh Gradam Uí Shúilleabháin leis, agus €5,000 ar an bhfoilsitheoir; bronnfar €1,250 ar an údar a bhuafaidh Gradam Réics Carló agus €5,000 ar an bhfoilsitheoir; agus bronnfar €500 ar aistritheoir an leabhair a bhuafaidh Gradam de Bhaldraithe agus €1,500 ar an bhfoilsitheoir.
San iomaíocht do Ghradam Uí Shúilleabháin tá:
Seacht dTír, Seacht dTeanga Diarmuid Johnson (Leabhar Breac)
Súil an Daill, Darach Ó Scolaí (Leabhar Breac)
Bláth na dTulach – Díolaim Ultach Realtán Ní Leannáin [eag.] (Éabhlóid)
Árasán Ógie Ó Céilleachair (Cló Iar-Chonnacht)
Flóra na Samhlaíochta Bríd Ní Mhóráin (Foilseacháin Ábhair Spioradálta)
Pobal na Gaeilge: Daonra, Institiúidí, Stádas agus Cumhacht Pádraig B. Ó Laighin (Cló na nGael)
San iomaíocht do Ghradam Réics Carló tá:
An Slipéar Gloine Fearghas Mac Lochlainn agus Paddy Donnelly (Futa Fata)
Dialann Emily Porter: Thíos Seal Thuas Seal Richie Conroy agus Don Conroy (LeabhairCOMHAR)
Fóir Orm Áine Uí Fhoghlú agus Deirdre Ní Thuathail/Clifford Hayes (Cló Iar-Chonnacht)
Rita agus an Fathach Máire Zepf agus Andrew Whitson (An tSnáthaid Mhór)
Spluff Splaifeirtí agus an tIonradh ar an bPlainéad Marz Ré Ó Laighléis agus Ray McDonell (Móinín)
San iomaíocht do Ghradam de Bhaldraithe tá:
Buachaill an Ghúna Máirín Ní Mhárta (Futa Fata)
Dónall Dána agus an Peileadóir Mór Máirín Nic Con Iomaire (Cló Iar-Chonnacht)
Khalil Máirín Nic Con Iomaire (Barzaz)
Asterix agus an Fear Feasa Gabriel Rosenstock (Dalen Éireann)
An Triúr Triallach: An Congó Seaghan Mac an tSionnaigh (Dalen Éireann)
“Déanaim comhghairdeas ó chroí leis na tithe foilsitheoireachta, na húdair, na maisitheoirí agus na haistritheoirí a bhain gearrliostaí na bliana amachTréaslaím an obair fhiúntach atá ar siúl acu ar fad chun litríocht agus foilsitheoireacht na Gaeilge a chur chun cinn.
“Tá gairmiúlacht, ard-chaighdeán foilsitheoireachta agus paisean ag baint le gach aon leabhar atá ainmnithe agus tá ríméid orainn an t-aitheantas cuí a thabhairt do na tithe foilsitheoireachta arís i mbliana. Ní raibh oiread rogha riamh ag léitheoirí na Gaeilge agus tréaslaím leis na foilsitheoirí an díograis a chaitear chun sár chaighdeán leabhair a fhoilsiú bliain i ndiaidh bliana,” a dúirt Máirín Nic Dhonnchadha, Ceannasaí an Oireachtais.
