Bhí daltaí bunscoile i mbun agóide lasmuigh de Theach Laighean arís ar maidin agus iad ag éileamh go dtógfar iarbhunscoil lán-Ghaeilge nua i ndeisceart chathair Bhaile Átha Cliath.
Bhí breis is céad dalta ó chúig Ghaelscoil atá lonnaithe sa scoilcheantar Bhaile Átha Cliath 2, 4, 6, agus 8 i mbun an léirsithe agus iad ag iarraidh ar an Aire Oideachais Norma Foley cinneadh a dhéanamh maidir le Gaelcholáiste nua a thógáil sa cheantar “gan a thuilleadh moille nó leithscéal ar bith eile”.
Deir an lucht feachtais go bhfuil foirgneamh iomlán nua tógtha le gairid do Ghaelcholáiste Chiarraí i dTrá Lí, áit a bhfuil daonra 23,000 duine ann, ach nach bhfuil aon iarbhunscoil lán-Ghaeilge ann chun freastal ar an 200,000 duine a bhfuil cónaí orthu i gceantair BÁC 2, 4, 6, agus 8.
“Cé go bhfuil ár bhfeachtas thar a bheith sásta do Thrá Lí, le daonra 23,000, go bhfuil foirgneamh nua saintógtha dá Ghaelcholáiste oscailte le déanaí, ní thuigimid conas atá an Rialtas seo ag séanadh na rochtaine céanna ar an ghaelscolaíocht a chur ar fáil don 200,000 duine ina gcónaí i mBaile Átha Cliath 2, 4, 6, 8 inár scoilcheantar féin,” a dúirt Victoria McQuaid, Príomhoide Bhunscoil Synge, atá ar cheann de na cúig Ghaelscoil sa cheantar.
“Is mór an frustrachas dúinne inár scoileanna go bhfuil dul chun cinn ollmhór á dhéanamh againn leis na daltaí le linn a gcuid ama linn ag cinntiú go gcuirtear oideachas dátheangach orthu ach ansin níl aon mheánscoil lán-Ghaeilge inár gceantar scoile dóibh le freastal uirthi,” a dúirt McQuaid.
Cé go bhfuil 44 iarbhunscoil lán-Bhéarla sa scoilcheantar ina bhfuil na cúig Ghaelscoil, níl aon ghaelcholáiste ann. Fágann sin go mbíonn ar chuid mhaith daltaí a fhaigheann a mbunoideachas trí mheán na Gaeilge freastal ar iarbhunscoil lán-Bhéarla ina dhiaidh sin.
Is iad Scoil Bhríde; Gaelscoil Lios na nÓg; Gaelscoil Eoin agus Gaelscoil Inse Chór na Gaelscoileanna eile atá ag éileamh iarbhunscoil lán-Ghaeilge sa cheantar agus bhí daltaí, tuismitheoirí agus múinteoirí ón chúig scoil i láthair ag an agóid inniu. Is é seo an ceathrú huair ó dheireadh 2021 go raibh na scoileanna i mbun agóide lasmuigh de Theach Laighean.
