Tá iarrtha ag Sinn Féin ar an Rialtas Coimisinéir Teanga nua a cheapadh “gan mhoill”.
Mar a tuairiscíodh ar an suíomh seo na tseachtain seo caite d’fhéadfadh an fómhar a bheith ann sula mbeidh Coimisinéir Teanga nua in oifig.
Tá an oifig gan coimisinéir ó d’éirigh Rónán Ó Domhnaill as an gcúram mí Feabhra agus tá an chuma ar an scéal go mbeidh roinnt míonna eile ann go dtí go bhfostófar a chomharba.
D’impigh urlabhraí Gaeilge Shinn Féin, Aengus Ó Snodaigh ar Aire na Gaeltachta Catherine Martin folúntas an Choimisinéara Teanga “a fhógairt ar an bpointe boise agus Coimisinéir nua a earcú gan mhoill”.
Dúirt Ó Snodaigh, atá ina Chathaoirleach ar Chomhchoiste Oireachtais na Gaeilge, na Gaeltachta agus Phobail Labhartha na Gaeilge, go raibh sé “thar a bheith tubaisteach” nach raibh an folúntas do phost an Choimisinéara fógartha go fóill.
Chuir Ó Snodaigh “moilleadóireacht” i leith an Aire agus dúirt sé nach raibh cosaint cheart ag an bpobal ó thaobh cearta teanga d’uireasa Coimisinéara.
“Gan Coimisinéir ceaptha, ní féidir le hOifig an Choimisinéara Teanga tuarascálacha nó imscrúduithe a fhoilsiú, rud a chiallaíonn nach mbeidh feidhm ag an gcosaint is láidre atá ann do chearta Gaeilgeoirí sa tír seo.
“Tá an mhoilleadóireacht seo ann anuas ar an bhfadhb a bhí againn ó thaobh Bhord Údarás na Gaeltachta, a líonadh cúpla mí ó shin, a d’fhág muid gan cruinnithe nó cinntí, agus tá patrún á chruthú ag Roinn na Gaeltachta nach bhfuil sé de chumas nó de nós acu tabhairt faoi fholúntais a líonadh a luaithe is a tharlaíonn siad chun a chinntiú gur féidir le heagrais riachtanacha na Gaeilge agus na Gaeltachta feidhmiú.”
Dúirt Ó Snodaigh nach raibh “leithscéal ar bith ag an Aire” mar gurb í Catherine Martin féin a cheap Rónán Ó Domhnaill ina Choimisinéir le Coimisiún na Meán. Ba chóir go mbeadh sé soiléir don Aire go mbeadh folúntas ann ach “níor chinn sí déileáil leis,” arsa Ó Snodaigh.
“Ní léir an ndearnadh dearmad an próiseas ainmniúcháin a thosnú, an easpa treorach ón aire [a bhí i gceist], nó neamh-inniúlacht, easpa measa nó eile a bhí taobh thiar de gan an folúntas a a bheith líonta.”
Dúirt Ó Snodaigh gur tugadh cumhachtaí breise don Choimisinéir Teanga sa reachtaíocht teanga a tugadh isteach le déanaí ach gur léir nach tosaíocht de chuid an Rialtais a bhí ann le fírinne.
Deir Roinn na Gaeltachta go bhfuiltear ag súil fógra faoi fholúntas a chur amach roimh dheireadh na míosa.
“Tá an Roinn ag tabhairt socruithe chun críche leis an tSeirbhís um Cheapacháin Phoiblí chun comórtas a fhógairt do phost an Choimisinéara Teanga,” a dúirt urlabhraí de chuid na Roinne. “Tá an Roinn ag súil go n-eiseofar an fógra le linn na coicíse seo amach romhainn.”
