‘Is fathaigh iad leath den fhoireann a bheidh ag imirt Dé Sathairn…ach cuimhnigh ar Ghóiliat’
Tá babhtaí leathcheannais an URC buailte linn agus is dóigh go bhfuil cluichí i ndán dúinn anois nach raibh mórán daoine ag súil leo seachtain ó shin.
Beidh Mumha ag taisteal go Baile Átha Cliath chun aghaidh a thabhairt ar Laighin agus, leis na gortuithe a d’fhulaing siad an tseachtain seo caite, tá dúshlán níos mó arís os a gcomhair. Níl fáil ar Conor Murray, RG Snyman, Calvin Nash, nó Malakai Fekitoa agus níl fios againn go fóill an bhfuil Diarmuid Barron agus Peter O’Mahony aclaí. Seisear imreoirí tábhachtacha atá iontu sin.
Ag an am céanna, beidh Laighin ag dul isteach sa chluiche seo le súil amháin ar an tseachtain seo chugainn, nuair a bheidh siad ag imirt in aghaidh La Rochelle sa chluiche craoibhe de chuid Chorn na Seaimpíní. Cinnte, beidh roinnt imreoirí ag imirt in aghaidh na Mumhan nach mbeidh páirteach an tseachtain seo chugainn, ach do roinnt imreoirí eile, is léir go mbeidh imní orthu roimh ghortú.
Beidh Laighin in ann foireann sách láidir a chur ar an bpáirc agus iad fós ag tabhairt sosa d’imreoirí eile. Tá tuiscint ag gach aon imreoir ar an stíl imeartha. Is cuma cé atá ar an bpáirc: tuigeann siad céard a theastaíonn uathu chun an stíl ionsaithe (nó cosanta) a imirt.
Tá sé riachtanach don Mhumhain go gcoinníonn siad cúig dhuine dhéag ar an bpáirc don chluiche uilig. Caithfidh siad an fhisiciúlacht chéanna a bhí acu seachtain ó shin a thaispeáint. Caithfidh siad cur isteach ar chliseadh Laighean agus síneadh amach Laighean a stopadh chomh maith agus is féidir. Caithfidh Mumha a bheith cinnte nach dtugann siad spás don dara líne den ionsaí freisin. Cinnte, níl mórán le déanamh acu!
Bhí bua iontach ag Connachta in aghaidh Uladh seachtain ó shin agus is dóigh go bhfuil na Stormers thar a bheith buíoch as an mbua sin; bheadh ar buaiteoirí cluiche na Stormers taisteal go Béal Feirste dá mbuafadh Ulaidh. Ach mar gheall gur bhuaigh Connachta, tá na Stormers ag fanacht sa bhaile don chluiche leathcheannais.
Tá go leor constaicí os comhair Chonnacht an deireadh seachtaine seo: tá orthu imirt as baile i gcoinne foireann thar a bheith fisiciúil i staid líon lán le lucht leanúna na Stormers in aimsir the ag airde 1,350m, gan trácht a dhéanamh ar chaighdeán na n-imreoirí atá acu: Kitschoff, Malherbe, Willemse, srl. Tá ciall leis an maíomh go mbuafadh na Stormers. Ach anois agus arís, ní bhaineann loighic leis an spórt.
Tá Connachta ag taisteal le foireann láidir, gan gortú ar bith ón gcluiche seachtain ó shin (mar chodarsnacht, gortaíodh seisear imreoirí de chuid na Mumhan). Bhuaigh Connachta sé as seacht dá gcluichí deireanacha, agus beidh siad ag súil le slán maith a thabhairt d’Andy Friend agus na daoine eile a bheidh ag fágáil na foirne ag deireadh an tséasúir. D’imir Connachta dhá chluiche in aghaidh na Stormers go dtí seo sa URC: 1-1 an scór atá eatarthu. Nílim ach ag rá go bhfuil seans ann.
Mar a luaigh mé, ní leathbhádóirí iad an spórt agus an loighic uaireanta. Cinnte, tá dúshlán ollmhór os comhair na Mumhan agus Connacht. Níl clú agam cén corrlach atá ag an dá fhoireann; níl suim agam iontu. Ach déarfainn gurb iad Laighin agus na Stormers roghanna na coitiantachta. Ach fós, tarlaíonn rudaí aisteacha sa spórt. Is fathaigh iad leath de na foirne a bheith ag imirt Dé Satharn, ach cuimhnigh ar céard a tharla do Ghóiliat.
