Tá leithscéal gafa ag Ollscoil Wrexham faoi theachtaireacht a sheol fear léinn san ollscoil inar dúirt sé go raibh comharthaí bóthair Breatnaise ag cur “mearbhall” ar dhaoine.
Phostáil an Dr Nigel Hunt pictiúr de chomhartha bóthair dátheangach ar líne agus dúirt sé go raibh comharthaí bóthair Breatnaise ag cur “mearbhall” ar dhaoine agus go raibh eolas iontu “nár theastaigh” agus a bhí “dainséarach”.
Saineolaí síceolaíochta é an Dr Nigel Hunt, ollamh ar cuairt in Ollscoil Wrexham, Prifysgol Wrecsam. Ar Facebook a sheol sé an pictiúr agus a dúirt sé gur cheart gur Béarla amháin a bheadh ar chomharthaí bóthair.
“Comharthaí mar seo. Tá siad ag cur mearbhall ar dhaoine agus tá eolas orthu nach dteastaíonn agus ní thuigeann formhór na ndaoine an t-eolas atá orthu.
“D’fhéadfadh comharthaí bóthair dátheangacha a bheith contúirteach mar tógann sé níos faide ar dhuine an teachtaireacht a dhéanamh amach.
“Ó tharla nach dtuigeann an chuid is mó de na daoine fiú sa Bhreatain Bheag na comharthaí seo (tá an Bhreatnais ag meath d’ainneoin na n-iarrachtaí í a scaipeadh), le bhur dtoil ná húsáidigí ach Béarla.”
Ghabh Ollscoil Wrecsam a leithscéal faoin gcaint sin ach d’áitigh siad nach é sin dearcadh fhoireann na hollscoile.
“Ba mhaith linn ár leithscéal a ghabháil faoi gcaint sin a chuir as do dhaoine agus tá an scéal á fhiosrú againn go hinmheánach. Ba mhaith linn a dhearbhú nach léiriú ar bith an chaint sin ar dhearcadh ná ar luachanna na hollscoile ná na foirne.
“Údar mórtais dúinn gur institiúid Bhreatnach muid agus táimid bródúil as ár stair agus ár n-oidhreacht Bhreatnach. Is mór againn an Bhreatnais a chur chun cinn agus a cheiliúradh agus is údar bróid dúinn a bheith ábalta a rá gur mó ná riamh na mic léinn a bhfuil deis acu anois réimse leathan dár gcúrsaí a staidéar go dátheangach…”
Fuair an Dr Nigel Hunt íde na muc agus na madraí ach a bhfacthas a phostáil ar Facebook agus dúirt go leor den dream ar chuir a chuid cainte as dóibh go raibh gearán oifigiúil déanta acu le hOllscoil Wrecsam.
