Tá leithscéal gafa ag an gcomhlacht Primark faoin scéala gur insíodh d’oibrí óg dá gcuid i mBéal Feirste gan geansaí a raibh ‘Nollaig Shona’ air a chaitheamh.
Glaodh isteach an tseachtain seo caite go dtí oifig a bainisteora bean óg i bpríomhshiopa Primark i mBéal Feirste toisc go raibh geansaí a raibh beannachtaí na Nollag i nGaeilge air.
Dúradh léi nár cheadmhach di an geansaí a chaitheamh níos mó.
Dúirt Primark leis an Irish News nach raibh aon pholasaí acu a chuireann cosc ar fhostaí ball éadaigh a bhfuil Gaeilge air a chaitheamh agus gur botún a bhí sa mhéid a tharla.
“Táimid go mór ar son áit oibre a bheith againn a mbíonn bheith istigh ag cách ann agus a mbíonn fáilte roimh gach aon duine ann,” a dúirt urlabhraí ó Primark.
“Tá fíorbhrón orainn gur tharla sé, eachtra aon uaire a bhí ann nár cheart go dtarlódh sé, agus tá céimeanna á dtógáil againn chun comhairle bhreise a chur ar ár gcomhghleacaithe faoin bpolasaí éadaigh atá againn ag an obair.”
Tuairiscíodh go ndúradh leis an oibrí i siopa Primark ar an Ascaill Ríoga nach mbeadh aon fhadhb ann dá mba Spáinnis a bhí ar a geansaí ach go mb’fhéidir go mbeadh daoine maslaithe ag an nGaeilge.
Dúradh léi nach raibh aon ghearán déanta ag aon duine faoi bheannachtaí na féile a bheith i nGaeilge ar a geansaí ach go raibh cosc uirthi é a chaitheamh arís ag an obair.
Chuir sí gearán faoi bhráid a ceardchumainn.
Tá cáineadh láidir déanta ag Conradh na Gaeilge agus ag an Dream Dearg ar Primark. Chuir siad fáilte roimh leithscéal an chomhlachta, ach dúirt siad gur trua mór gur tharla a leithéid agus gur léirigh sé an gá a bhí le polasaithe cearta i leith na Gaeilge.
