Tá ollscoil in Albain le fáil réidh le céimeanna sna ‘nuatheangacha’, an Ghàidhlig san áireamh.
Tá glactha ag Ollscoil Obar Dheathain le moladh go gcuirfí deireadh le céimeanna sna nuatheangacha, rud a fhágann nach mbeidh an rogha ag mic léinn céim onórach a dhéanamh sa Fhraincis, sa Ghearmáinis, sa Spáinnis nó sa Ghàidhlig feasta.
Beidh ar mhic léinn ábhar eile a roghnú mar chuid de chomhchéim más mian leo staidéar a dhéanamh ar aon cheann de na nuatheangacha.
Ghlac údaráis Ollscoil Obar Dheathain [Aberdeen] an tseachtain seo le moladh a rinne Leas-Phríomhoide Sinsearach na hOllscoile, Karl Lydecke, go gcuirfí deireadh le céimeanna onóracha i dteangacha aonair.
Mar chuid den mholadh, d’fhéadfadh sé go dtiocfadh laghdú ar líon na dteangacha a bhíonn á múineadh san ollscoil.
Seachas na ceithre theanga atá á gcur ar fáil faoi láthair, péire nó trí theanga a bheadh á múineadh in Ollscoil Obar Dheathain.
Tá an moladh ar cheann de thrí cinn de mholtaí a rinneadh mar chuid den athbhreithniú atá á dhéanamh ar sholáthar teangacha in Ollscoil Obar Dheathain.
Bhí imní ann go nglacfaí le moladh eile agus fáil réidh leis na céimeanna ar fad a bhfuil nuatheanga mar ábhar ainmnithe iontu. Dá nglacfaí leis an mholadh sin, bheadh múineadh teangacha á gcur ar fáil ag an ollscoil mar “cúrsaí roghnacha” nó mar chuid de chéimeanna ‘Gnó le Fraincis’ nó ‘Dlí le Spáinnis’ mar shampla.
Deir lucht na hOllscoile go bhfuil an t-athbhreithniú ar bun mar gheall ar an “titim mhór” a tháinig ar líon na mac léinn atá ag déanamh staidéir ar theangacha san ollscoil le roinnt blianta anuas.
Titim 56% a tháinig ar líon na mac léinn a thugann faoi theangacha san ollscoil le trí bliana anuas. In 2021, chláraigh 62 mac léinn nua le cúrsaí sna nuatheangacha san Ollscoil, agus 27 mac léinn atá i gceist i mbliana. Tá cúigear den 27 mac léinn ag tabhairt faoi chéim onórach i gceann de na nuatheangacha i mbliana, céim nach mbeidh ar fáil an bhliain seo chugainn.
Tá titim mhór tagtha ar líon na mac léinn a dhéanann staidéar ar theangacha in ollscoileanna ar fud na Breataine agus sa Tuaisceart.
Tá níos lú daoine ag déanamh staidéar ar theangacha don A-Leibhéal ná riamh agus deireadh leis an riachtanas staidéar a dhéanamh ar theanga don GCSE ó 2004.
