Tá féile nua, Dorn san Aer, bunaithe in ómós don sárchraoltóir aitheanta Rónán Mac Aodha Bhuí.
Beidh an fhéile cheoil, atá á heagrú ag cairde agus muintir Rónáin Mhic Aodha Bhuí, i dteannta ceoltóirí a spreag sé agus ar chuidigh sé leo i rith na mblianta, ar siúl i nGaoth Dobhair i nGaeltacht Dhún na nGall i mí Mheán Fómhair seo chugainn.
Agus an fhéile á fógairt, dúirt lucht eagraithe na féile Dorn San Aer gur mian leo “an splanc a las Rónán a choinneáil beo”.
“Bliain i ndiaidh a bháis, is mian linne, cairde, teaghlach agus pobal Rónáin, cuireadh a thabhairt do dhaoine, óg agus aosta, a theacht le chéile le comóradh a dhéanamh ar a shaol agus leis an splanc a las Rónán a choinneáil beo – agus is chuige sin atá muid ag cur tús leis an fhéile úr Dorn san Aer.”
Is féile trí lá a bheas in Dorn san Aer, a bheas ar siúl i nGaoth Dobhair, ceantar dúchais Mhic Aodha Bhuí.
Déanfaidh an gníomhaí cearta sibhialta Bernadette McAliskey an fhéile a oscailt go hoifigiúil ar an Aoine an 27 Meán Fómhair in Amharclann Ghaoth Dobhair agus leanfaidh na himeachtaí ar aghaidh go dtí an Domhnach.
Beidh meascán mór ceoil le cloisteáil – rac, hip-hop, traid leictreach, ceol Gaelach, ska, reggae – chomh maith le cainteanna spreagúla, Lá Teaghlaigh agus comórtas Cath na mBannaí.
Ar phríomhaíonna na féile beidh Bréag – banna as Béal Feirste a sheinn go minic ag an Cabaret Craiceáilte, oíche cheoil rialta a d’eagraigh Rónán Mac Aodha Bhuí i dTeach Hiúdaí i nGaoth Dobhair. Beidh Huartan, banna a bhuaigh duais Rónáin Mhic Aodha Bhuí ag Gradaim Ceoil Nós, ar stáitse ag Féile Dorn San Aer, chomh maith le Grooveline, banna func-snagcheoil, agus John Spillane, fear a bhuaigh dhá Dhuais Meteor don cheoltóir Ceol Tíre/Traid is fearr.
I measc na gceoltóirí eile a bheas ag dul ar stáitse, beidh an hamhránaithe Emma Ní Fhíoruisce agus Eve Bell, an píobaire Ciarán Mac Fheidhlimidh, an t-amhránaí agus fidléir Róisín Chambers, agus na grúpaí IMLÉ, Na Fíréin, Cigire na bPuntaí agus Elephant Brothers.
I measc na n-imeachtaí a bheas ar siúl le linn an deireadh seachtaine beidh Ceardlann Damhsa, Preab sa Cheol, seó do pháistí óga agus seisiún ióga.
Dúirt lucht Fhéile Dorn San Aer gur deis atá san fhéile teacht le chéile agus “saol agus oidhreacht Rónáin a cheiliúradh”.
“Ba laoch é ag go leor agus ba Ghúrú na nGael é ar na haerthonnta. Ba dheacair cur síos iomlán a dhéanamh ar an tionchar réabhlóideach a bhí ag Rónán ar shaol cultúrtha na nGael ar fud an domhain, ba chraoltóir radacach é agus ba ghníomhaí pobail den scoth é agus cronaíonn muid uainn go mór é i gcónaí,” a dúradh.
Tá ticéid lae, ticéid deireadh seachtaine agus ticéid teaghlaigh, chomh maith le tuilleadh eolais faoin fhéile ar fáil anseo.
