Tá cosaint déanta ag an ghrúpa KNEECAP as Béal Feirste ar phóstaer poiblíochta dá gcamchuairt nua ina bhfuil ceannaire an DUP agus Príomh-Aire na Breataine le feiceáil agus iad ceangailte de roicéad ar bharr tine chnámh.
Sa phóstaer, léirítear ceannaire an DUP Arlene Foster agus Príomh-Aire na Breataine Boris Johnson ar bharr tine chnámh, a bhfuil an chuma uirthi gur i gceantar an New Lodge in iarthar Bhéal Feirste atá sí.
Tá an bheirt rapairí atá sa ghrúpa, Móglaí Bap agus Mo Chara, a tógadh le Gaeilge i mBéal Feirste, le feiceáil sa phóstaer agus greim ag duine acu ar bhuama peitril.
Cáineadh an póstaer ar na meáin shóisialta agus dúirt duine amháin go raibh KNEECAP ag teacht i dtír ar “fíorthráma” a d’fhulaing daoine le linn na dtrioblóidí.
I ráiteas a chuir KNEECAP amach faoin phóstaer conspóideach, a scaipeadh ar leathanaigh shóisialta an ghrúpa an tseachtain seo, dúradh nach bhfuil sa phóstaer ach “dea-phíosa ealaíne”.
“Baineann an póstaer leis an chéad chamchuairt ag KNEECAP i Sasana agus in Albain.
“Bhí muid ag iarraidh dul i bhfeidhm ar ár gcomrádaithe i Sasana agus in Albain a bhfuil orthu cur suas leis na Tóraithe lofa, agus leis an slad atá á dhéanamh acu ar an lucht oibre.
‘Farewell to the Union Tour’ atá á thabhairt ag an ngrúpa ar an chamchuairt nua.
Dúirt KNEECAP nach miste leo má chuireann na póstaer isteach ar dhaoine, a fhad is a théann siad chuig na ceolchoirmeacha atá beartaithe acu i nGlaschú, Londain agus Learpholl mí Feabhra seo chugainn.
Ní hé seo an chéad uair go bhfuil conspóid tarraingthe ag KNEECAP orthu féin.
Anuraidh bhí tuairiscí faoi na rapairí Feirsteacha sna meáin i ndiaidh dóibh a bheith díbeartha den stáitse ag ceolchoirm sa Choláiste Ollscoile, Baile Átha Cliath.
Rinne an DUP cáineadh ar an bhanna roimhe sin mar gheall go raibh ‘Brits Out’ á bhéiceadh ón stáitse ag lucht KNEECAP ag ceolchoirm san Empire Music Hall i mBéal Feirste.
Chuir Facebook cosc trí lá ar leathanach KNEECAP tar éis don bhanna físeán den eachtra a chur suas.
Bhí conspóid freisin i gceist leis an chéad amhrán a d’eisigh an grúpa ‘C.E.A.R.T.A’.
Reáchtáil an grúpa feachtas ar na meáin shóisialta ag tús na bliana seo caite nuair a baineadh ‘C.E.A.R.T.A’ ó sheinnliosta RTÉ 2 FM mar gheall ar eascainí agus tagairtí d’úsáid drugaí a bheith ann.
Gheall an banna an t-am sin “go mbeadh gach amhrán chomh conspóideach lena chéile agus nach mbeadh cead ag aon amhrán a bheith ar RTÉ 2FM go deo”.
