5 thraidisiún a bhaineann le Bliain Nua na Síneach

Stair – Thosaigh ceiliúradh Bhliain Nua na Síneach thart ar 2300 RC. Bunaíodh é le bheith ar an gcéad lá den chéad mhí (san fhéilire traidisiúnta Síneach) nuair a bhí ríshliocht Han i réim.

Cathain – Braitheann an fhéile seo ar an ngealach. Tosaíonn sé ar an gcéad gealach úr atá ann idir an 21 Eanáir agus an 20 Feabhra. An bhliain seo, beidh sé ar an Satharn, 25Eanáir.

Piseoga – Tá go leor piseog ag baint le Bliain Nua na Síneach. Ceann de na cinn is suimiúla dar linn ná nach cóir aon ghlanadh a dhéanamh. Baineann sé seo leis an ádh. An lá roimh Bhliain Nua na Síneach caitear an lá ag glanadh. Ina dhiaidh sin ní féidir leat glanadh ar bith a dhéanamh go dtí an 5ú lá ar fhaitíos go nglanfaidh tú d’ádh as an teach.

Ceann eile atá an-spéisiúil dar linn ná nach cóir siosúr, scian nó aon rud géar a úsáid. Baineann na nithe géara de do shaibhreas agus do rath agus mar sin b’fhearr iad a sheachaint dar leis an traidisiún.

Dinnéar Oíche Chinn Bliana (年夜饭- Nián yèfàn)

Deirtear gurb é dinnéar Oíche Chinn Bliana an béile is tábhachtaí do mhuintir na Síne toisc gurb é an ceiliúradh clainne is mó den bhliain. Bíonn ar gach duine sa chlann filleadh don bhéile agus mura féidir leo, fágtar spás dóibh ag an mbord. Glaoitear ‘dinnéar teacht le chéile’ (团年饭 – tuán niánfàn) ar an traidisiún seo.

I rith an dinnéir, itear iasc chomh maith le domplagáin, an mhias is mó cáile i dtuaisceart na Síne. Braitheann na miasa eile ar rogha an duine féin. Itheann an chuid is mó de mhuintir na Síne dinnéar Oíche Chinn Bliana le chéile sa bhaile in ionad dul go bialann.

Shou Sui

Ciallaíonn Shou Sui “tar éis Dhinnéar Oíche Chinn Bliana” mar de ghnáth fanann an teaghlach ina ndúiseacht i rith na hoíche. Ní fhanann roinnt daoine ina ndúiseacht ach go meán oíche tar éis dóibh breathnú ar thinte ealaíne. De réir an tseanchais, bhí ainmhí miotasach ann darbh ainm an “Year” agus tagann sé amach i rith Oíche Chinn Bliana chun dochar a dhéanamh do dhaoine, ainmhithe agus nósanna an tsaoil.

Níos déanaí d’fhoghlaim muintir na tíre go raibh eagla ar an ‘Year” roimh an dath dearg, tine agus torainn arda. Mar sin, teilgeann daoine tinte ealaíne ag Oíche Chinn Bliana chun ruaig a chur air. Lastar tinte chomh maith agus fanann daoine ina ndúiseacht don oíche ar fad chun iad féin a chosaint ón “Year.”

Paicéid Dhearga

Is clúdach dearg é an paicéad dearg a bhfuil airgead istigh ann, idir yen amháin agus cúpla míle yen. De ghnáth thug daoine fásta, go háirithe lánúin phósta, agus seandaoine, paicéad dearg do pháistí. Creidtear go stopann an t-airgead sin olcas sna páistí, go coimeádtar slán iad dá bharr agus go dtabharfaidh sé saol fada dóibh.

An Athbhliain Bheag – Xiao Nian

Bíonn An Athbhliain Bheag ar siúl an 23ú nó 24ú de Mhí na Nollag. Deirtear go bhfágann Dia an Bhia, Zao Jun le dul chuig na flaithis le tuairisciú a dhéanamh ar ghníomhaíochtaí an teaghlaigh d’Impire na flaithis.

Leanann daoine an searmanas reiligiúnach le slán a rá le Dia an Bhia. Baintear anuas aon phictiúr dó agus cuirtear trí thine é. Tar éis Lá Caille, ceannóidh daoine pictiúir nua do Zao Jun agus cuirfidh siad na pictiúir ar taispeáint arís sa chistin.

Margaí na hAthbhliana

I rith laethanta na hAthbhliana cuirtear margaí sealadacha ar siúl a dhíolann earraí a bhaineann leis an Athbhliain ar nós éadaí, tinte ealaíne, maisiúchán, bia agus roinnt mhaith eile. De ghnáth bíonn na margaí maisithe le laindéir agus soilse beaga eile.