Fógraíodh tráthnóna go raibh 41 duine eile a raibh Covid-19 orthu básaithe ó dheas.
Fógraíodh 58 bás ar fad in Éirinn inniu.
Tuairiscíodh níos túisce inniu go raibh 17 duine eile a bhí buailte ag Covid-19 básaithe in ospidéil an Tuaiscirt.
764 duine ar a laghad atá básaithe in Éirinn faoin tráth seo de thoradh na paindéime, 571 duine ó dheas den teorainn agus 193 duine ó thuaidh di.
Maidir leis an 571 bás ó dheas:
- Tharla 330 (57%) acu in ospidéal
- Tharla 46 (9%) acu in aonaid dianchúraim
- Bhí fadhbanna sláinte eile ag 81%
- Bhí an duine is sine 105 bliain anuas agus 23 a bhí an duine is óige
- Fir a bhí i gceist i 326 cás (57%) agus mná ab ea 245 (43%)
- 83 bliain ‘daois an aois mheánach a bhí acu
778 cás nua den ghalar a deimhníodh ó dheas tráthnóna, rud a fhágann go bhfuil 17,244 cás deimhnithe anois in Éirinn 14,758 ó dheas agus 2,486 ó thuaidh.
San oirthear a bhí 35 de na daoine is déanaí a fógraíodh a mbásanna ó dheas, bhí beirt san iarthuaisceart agus bhí ceathrar in iarthar na tíre.
23 bean agus 18 fear a bhí i gceist agus an aois mheánach a bhí acu ná 83.
Bhí fadhbanna sláinte eile ag 35 acu.
De réir an eolais is déanaí ó dheas, eolas a bhain leis an 13,746 cás a bhí deimhnithe faoi mheán oíche Déardaoin seo caite:
- Fir a bhí i gceist le 44% de na cásanna agus mná iad 55%
- 454 braisle cásanna a bhí i gceist ar bhain 2,964 cás leo san iomlán
- An aois mheánach a bhí ann i measc na n-othar ná 48 bliain d’aois
- Cuireadh cúram san ospidéal ar 2,168 duine (16%)
- As na daoine sin, cuireadh 296 duine in ICU, nó Aonad Dianchúraim
- Oibrithe sláinte a bhí i gceist le 3,573 cás
- I mBaile Átha Cliath a bhí an líon is mó cásanna le 6,934 cás, nó 50%, agus bhí Corcaigh sa dara háit, le 979 cás, nó 7%
- 273 cás a bhí i gcontae na Gaillimhe (2%),256 a bhí i gcontae Chiarraí (1.9%), 369 cás a bhí i nDún na nGall (2.7%), 273 cás a bhí i Maigh Eo (2%), 110 cás a bhí i bPort Láirge (0.8%) agus 461 cás a bhí i gcontae na Mí (3.4%)
- Scaipeadh sa phobal ba chúis le 52% de chásanna, gartheagmháil le hothar eile ba chúis le 43% agus taisteal thar lear ba chúis le 5%
Soiléiríodh inniu nach ionann líon na mbásanna a fhógraítear gach tráthnóna agus líon na ndaoine a fuair bás in aon lá amháin. Is ionann iad agus líon na mbásanna ar cuireadh an Roinnt Sláinte ar an eolas fúthu ón lá roimhe sin agus mar sin baineann cuid de na cásanna le básanna a tharla tamall níos faide ó shin ach nach raibh an Roinn curtha ar an eolas fúthu.
Léiríonn eolas nua maidir le cathain a tharla na básanna go bhféadfadh gur shroich an ráig a buaic i dtaobh líon na marbh thart ar dheich lá ó shin.
Idir an dá linn, d’fhógair an Eagraíocht Dhomhanda Sláinte (WHO) inniu nach raibh aon fhianaise ann go mbíonn imdhíonacht ar Covid-19 ag duine a bhfuil an galar curtha de aige.
