Tá súil ag lucht an fhoclóra Béarla-Gaeilge nua go gcuirfidh a saothar deireadh leis an seamsán nach bhfuil aon fhocail ann sa Ghaeilge le cur síos a dhéanamh ar an ngnéas.
Ach oiread le foclóir.ie, an leagan leictreonach den fhoclóir nua, tá cuid mhór iontrálacha a bhfuil aicmiú ‘gáirsiúil’ déanta orthu sa Concise English-Irish Dictionary, nó Foclóir Uí Mhianáin.
Níor chúb foireann an fhoclóra ón droch-chaint ná ó théarmaí tíriúla d’achan saghas, agus ní dhéanann siad aon leithscéal as bheith istigh a thabhairt don chuid is graosta den teanga.
Ní ar mhaithe leis an gcinsireacht a bhíonn an fhoclóireacht, a deirtear san aiste stíle agus gramadaí atá ag deireadh an fhoclóra nua 1,800 leathanach.
“Lexicography is not censorship” a deirtear san iar-aiste spéisiúil a ghabhann leis an bhfoclóir agus dóchas ag lucht an fhoclóra go n-éireoidh leis na leaganacha Gaeilge de théarmaí gáirsiúla áirithe ann corc a chur faoi dheireadh sa ‘tiresome refrain that Irish has no words to describe sex!’.
“Bíonn réim na teanga fíorthábhachtach agus muid ag dul ón ngnáthchaint neamhfhoirmeálta go dtí teanga atá graosta agus an-neamhfhoirmeálta go deo.
“Ó tharla go raibh caint nó teanga neamhfhoirmeálta á cur ann, ar éigean a d’fhéadfaí eascainí agus teanga gháirsiúil a fhágáil as an bhfoclóir nua Béarla-Gaeilge. Tar éis an tsaoil ní hionann foclóireacht agus cinsireacht, agus cá bhfios nach gcuirfeadh na haistriúcháin seo deireadh go deo leis an seanscéal meirgeach sin nach bhfuil aon fhocal sa nGaeilge le cur síos a dhéanamh ar an ngnéas,” a deirtear sa bhfoclóir nua.
30,000 ceannfhocal atá sa Concise English-Irish Dictionary , a raibh Pádraig Ó Mianáin, scoláire Gaeilge as Doire, ina Phríomh-Eagarthóir air.
Tá an saothar nua bunaithe ar foclóir.ie, an foclóir ar líne atá áirithe ar cheann de na tograí Gaeilge is uaillmhianaí agus is tábhachtaí dá raibh ann le fada.
48,000 ceannfhocal atá sa bhfoclóir ar líne ach ar ndóigh ba ghá ciorruithe a dhéanamh don leagan clóite.
1,700 leathanach atá i gcorp an fhoclóra agus tá 80 leathanach d’fhorlíonadh teanga agus gramadaí ann.
Is é Foclóir an Mhianánaigh, togra de chuid Fhoras na Gaeilge, an chéad saothar dá leithéid ó foilsíodh foclóir Thomáis de Bhaldraithe i 1959.
8,000 cóip den fhoclóir nua atá foilsithe agus comhlacht Éireannach atá lonnaithe san Iodáil a chuir i gcló é.
