Tá sé ráite ag Uachtarán Stát Aontaithe Mheiriceá Donald Trump go raibh toradh dearfach ar thástáil don choróinvíreas a cuireadh air féin agus a bhean Melania Trump.
Ar Twitter a d’fhógair Trump an scéal go raibh Covid-19 tolgtha aige féin agus a bhean agus dúirt sé go rachaidís beirt ar choraintín láithreach.
Tonight, @FLOTUS and I tested positive for COVID-19. We will begin our quarantine and recovery process immediately. We will get through this TOGETHER!
— Donald J. Trump (@realDonaldTrump) October 2, 2020
Bhí toradh dearfach ar an tástáil don víreas a cuireadh Déardaoin ar dhuine de chomhairleoirí an uachtaráin, Hope Hicks.
Agus gan ach mí fágtha go dtí toghchán uachtaránachta Mheiriceá ar an 3 Samhain, ní fios go fóill cén tionchar a bheidh ag an scéal ar cheann de na feachtais is cinniúnaí i staire na tíre.
Dúirt dochtúir an Uachtaráin Seán Conley go raibh Trump agus a bhean “ag coinneáil go maith” agus go mbeadh a ndualgais á gcomhlíonadh aige fad is a bheidh sé ag fanacht glan ar dhaoine sa Teach Bán.
Tá beag is fiú déanta go minic ag Donald Trump den phaindéim Covid-19, cé go ndúirt sé in agallamh leis an iriseoir cáiliúil Bob Woodward gur thuig sé i gcónaí a thromchúisí is a bhí an scéal ach gurb amhlaidh nach raibh sé ag iarraidh scaoll a chur i ndaoine. Déantar cáineadh air chomh maith faoina dhearcadh patuar i leith caitheamh mascanna agus faoi gan aon scaradh sóisialta ceart a bheith i bhfeidhm ag na mórócáidí toghchánaíochta a bhíonn á reáchtáil aige in ainneoin na paindéime.
Tholg Príomhaire na Breataine Boris Johnson agus Uachtarán na Brasaíle Jair Bolsonaro an víreas roimhe seo ach d’fhéadfadh Donald Trump a bhith níos leochailí ná an bheirt sin.
Chuir Melania Trump tvuít amach chomh maith ag fógairt an scéil.
As too many Americans have done this year, @potus & I are quarantining at home after testing positive for COVID-19. We are feeling good & I have postponed all upcoming engagements. Please be sure you are staying safe & we will all get through this together.
— Melania Trump (@FLOTUS) October 2, 2020
