Tá an scannánóir aitheanta Pat Collins ceaptha ina bhall d’Aosdána.
Tá Pat Collins, arb as iarthar Chorcaí dó, ar dhuine den dáréag ealaíontóirí, ceoltóirí, scannánóirí agus scríbhneoirí a ceapadh ina mbaill nua d’Aosdána an mhí seo.
Is iomaí clár faisnéise Gaeilge a stiúir Pat Collins agus is mó duais a bhuaigh sé as a shaothar.
Is é Pat Collins a stiúir Song of Granite, fadscannán faisnéise faoi shaol agus saothar an amhránaí Joe Éinniú a thuill go leor gradam. Ba é chomh maith a bhí ina stiúrthóir ar an scannán Tim Robinson: Connemara, faoi shaol agus shaothar an chartagrafaí cháiliúil arbh údar, ealaíontóir agus cartúnaí é chomh maith.
I measc na scannán Gaeilge eile a rinneadh faoi stiúir Collins, tá Taibhsí i mBéal na Gaoithe, scannán faoin mhórfhile Gaeilge Nuala Ní Dhomhnaill a rinneadh in 2007 agus an scannán Oileán Thoraí, faoi shaol na n-oileánach, a craoladh den chéad uair in 2002. Rinne sé scannán chomh maith faoin bhfile dátheangacha Michael Hartnett, A Necklace of Wrens.
Ag labhairt di faoi cheapachán Pat Collins ina bhall d’Aosdána, dúirt Ard-Mhéara Chorcaí, Mary Linehan Foley, gur “fathach i saol na scannánaíochta” é Collins a chuir go mór le saol na bhfísealaíon in Éirinn agus go hidirnáisiúnta.
“Tá scannáin á ndéanamh ag Pat Collins le blianta fada agus is aitheantas atá ina thoghadh ar Aosdána don tionchar a bhí aige ar na físealaíona anseo i gCorcaigh, go náisiúnta agus go hidirnáisiúnta. Agus Pat anois tofa i measc lucht físe is uaisle Aosdána, léiriú atá ann ar a thábhachtaí atá sé i saol na scannánaíochta. Tá an onóir seo saothraithe go maith aige agus is dual dó a bheith ina bhall d’Aosdána.” a dúirt Ard-Mhéara Chorcaí, Mary Linehan Foley.
Is iad na baill nua eile d’Aosdána Kevin Barry (Litríocht); Gina Moxley (Litríocht); Martin Lynch (Litríocht); Arthur Riordan (Litríocht); Gerard Byrne (Físealaín); Margo Harkin (Físealaín); Mairéad Ó hEocha (Físealaín); Valerie Mulvin (Ailtireacht); Liz Roche (Córagrafaíocht); Jennifer Walshe (Ceol) agus Jim Doherty (Ceol).
