Ceannaigh sa Ghaeltacht! Liosta bronntanas as Conamara
An bhfuil bronntanais Nollag á lorg agat fá choinne do theaghlaigh agus do chairde faoi láthair? An bhfuil deacracht agat rud éigin atá pearsanta, speisialta agus a rinneadh in Éirinn a aimsiú? Ná bí buartha, seo daoibh smaointe de bhrandaí atá ar fáil ar shlí an Atlantaigh Fhiáin i nGaeltacht Chonamara an Nollaig seo!
Pacáiste ceithre phróca – €18 ón mBuilín Blasta
Caifé atá suite ar imeall na farraige i gCeardlann an Spidéil, tá Gaeilge agus fáilte anseo, chomh maith le bia den chéad scoth. Déantar seatnaí, anlann, blastán agus maonáis dá gcuid féin, atá ar fáil le ceannach ar an suíomh anois. Is féidir ciseán galánta a chur le chéile mar bhronntanas do do chuid tuismitheoirí, nó fiú duit féin, más mian leat! Tá an Builín Blasta ag cur duais ar fáil fá choinne comórtais do léitheoirí NÓS, ciseán le 3 phróca d’anlann s’acu féin agus dearbháin €20. Coimeádaigí súil amach don comórtas!
Uachtar Aghaidhe agus Uisce Glantach – €37 ó Rí na Mara
Comhlacht cúraim craicinn a bhaineann úsáid as táirgí nádurtha atá ar fáil ar Shlí an Atlantaigh Fhiáin. Tá algaí saibhre na farraige ina gcomhábhar i ngach táirge ón gcomhlacht cosmaidí feamainne seo. Tá éileamh ollmhór tagtha ar chúram craicinn le blianta anuas, agus daoine ag tabhairt air dá gcuid craicinn gan damáiste a dhéanamh. Tá go leor táirgí ar fáil ar shuíomh Rí na Mara le cuma óg agus shláintiúil a chur ort féin! Is smaoineamh deas é an t-uachtar aghaidhe agus uisce glantach a cheannach le chéile mar bhronntanas an Nollaig seo. Tá Rí na Mara ag cur lascaine 10% ar fáil leis an gcód CHRISTMAS.
Bosca coinnle lámhdhéanta soighe agus cnó cócó – (€34.95) ó Fhiáin
Branda cóirithe agus maireachtála ar Shlí an Atlantaigh Fhiáin ina bhfuil achan táirge lámhdhéanta ag Dara agus Caitríona. Tá raon leathan táirgí ar fáil ó earraí leathair go fearais bhearrtha. Déanann an comhlacht Fiáin coinnle eiticiúla gan peitriliam iontu. Déantar na coinnle le céir cnó cócó agus soighe, le rogha éagsúla bolaí ar fáil, mar shampla: líoma & ómra. Tabhair tacaíocht don chomhlacht speisialta seo an Nollaig seo le coinnle do do mháthair nó fearas bearrtha do d’athair!
Poitín (50cl) – €38.99 ó Mhicil
B’fhéidir gur deoch beag atá á lorg agaibh le tabhairt do mhamó an Nollaig seo? Is fiú buidéal Micil Poitín a fháil, déanta as eorna bhraiche agus oideas teaghlaigh atá 170 bliain d’aois in úsáid acu. Tá an poitín ar fáil le ceannach ar shuíomh idirlín Celtic Whiskey Shop faoi láthair. Tá jin á dhéanamh ag Micil freisin, más fearr le do mhuintir triail a bhaint as sin. Sláinte mhaith, mar a deirtear i gConamara!
Geansaí ‘Ar Scáth a Chéile a Mhaireann na Daoine – €34 ón Spailpín Fánach
Siopa éadaí a chuireann Gaeilge ar tháirgí uilig s’acu! Tá An Spailpín Fánach lonnaithe i gceardlann an Spidéil agus cé nach bhfuil an siopa oscailte faoi láthair, is féidir táirgí a ordú ar líne agus iad a bhailiú ón siopa. Is bronntanas an-oiriúnach é an hoodie a deir ‘ar scath a chéile a mhaireann na daoine’ don bliain aisteach seo! Tá go leor eile ar an suíomh freisin, do pháistí, daoine fásta agus daoine aosta.
‘Create Your Own Hamper‘ – ag tosú ag €7.50 ó Mhainistir na Cille Móire
Thig leat do chiseán féin a chur le chéile leis na táirgí éagsúla atá ar fáil ó shuíomh Kylemore Abbey. Tá anlann, subh, seacláid, seatnaí, marmaláid, maróg Nollag, earraí potaireachta, cuimhneachán agus go leor eile ar fáil ar an suíomh le ciseán galánta a dhearadh agus a thabhairt do do mhuintir. Ábhar lámhdhéanta le bronntanas pearsanta álainn a roinnt le do theaghlach an Nollaig seo.
Salann feamainne (50g) – €4.95 ó Connemara Organic Seaweed Company
Comhlacht a chuireann táirgí inbhuanaithe ar fáil trí húsáid a bhaint as feamainn inite. Cuireann siad táirgí cúraim craicinn ar fáil, chomh maith le táirgí bia. Ceannaigh cúpla próca Seaweed Salt nó Seaweed Seasoning s’acu, chomh maith le roinnt Sweet Kelp & Kombu Kelp le pacáiste deas a chur le chéile fá choinne duine éigin gur breá leo a bheith ag cócaráil. Blasta agus folláin! Déan cinnte go n-ordaíonn sibh roimh an 10ú Nollaig le cinntiú go dtagann bhur gcuid táirgí in am don lá mór!
Táim buíoch as achan comhlacht a bhí sásta labhairt liom agus an t-eolas, pictiúir, lascainí & táirgí a chur siad ar fáil. Ná déanaigí dearmad tacaíocht a thabhairt do chomhlachtaí Éireannacha a Nollaig seo, más féidir leat!
