Cluichí ceannais peile 2020: cé a bheidh ag ceiliúradh?

Nuair a smaoinítear ar spórt an tsamhraidh, is í an chraobh idirchontae agus turais teaghlaigh go Páirc an Chrócaigh is mó a thagann chun cuimhne go minic. De ghnáth faoin am seo den bhliain bíonn imreoirí fud fad na tíre ag ligean a scíthe, ag ullmhú don Nollaig agus iad imníoch cheana féin faoin traenail réamhshéasúir atá os a gcomhair sa bhliain úr.

Tá rudaí go hiomlán bun os cionn i mbliana áfach agus níor tosaíodh an séasúr idirchontae go dtí an 17ú Deireadh Fómhair – rud a chuir go mór leis an séasúr club le linn an tsamhraidh.

Tá an Nollaig chóir a bheith buaillte linn anois agus na cluichí ceannais idirchontae go fóill le himirt i ndúlaíocht an gheimhridh. Níl na gnáthshluaite istigh sna staideanna móra agus is aisteach an rud é guthanna na mbainisteoirí agus na héin a chloisteáil ar an teilifís agus muid cleachtaithe le huimhreacha os cionn 80,000 a fheiceáil i gceanncheathrú CLG.

An deireadh seachtaine seo, beidh Baile Átha Cliath agus foireann Mhaigh Eo ag imirt in éadan a chéile arís eile sa chluiche ceannais peile agus foireann na príomhchathrach ag dul don seú bua as a chéile.

Buailfidh mná Chorcaí le Baile Átha Cliath i gcluiche ceannais pheil an mban. Tá muid i ndiaidh dul chun cinn ollmhór a fheiceáil i mbliana i dtaca le mná spóirt agus is mór an trua nach féidir le slua a bheith i láthair ag an chluiche seo idir an dá fhoireann is láidre sa tír. An mbeidh na reibiliúnaigh in ann stop a chur le rath Bhaile Átha Cliath?

Labhair Kevin Cassidy, Máire Ní Bhraonáin agus Tadhg Corkery linn faoin séasúr peile ó thaobh na bhfear agus na mban de go dtí seo i mbliana agus chuala muid a dtuairimí faoi cé acu a bheas an bua an deireadh seachtaine seo i gcluichí ceannais na hÉireann.