Tá buaiteoirí Ghradaim Cheoil TG4 2021 fógartha.
Bronnfar Ceoltóir na Bliana 2021 ar Angelina Carberry ag ócáid bronnta na ngradam, a bheidh ar siúl in Ollscoil na Banríona i mBéal Feirste Oíche Shamhna mar chuid den cheiliúradh ar 25 bliain de TG4.
Rugadh Angelina Carberry i Manchain Shasana ach tá sí ina cónaí sa Longfort ó bhí na 1990idí ann, áit dúchais a muintire a bhfuil cáil mhór an cheoil orthu.
Ar an bhfeadóg stáin a thosaigh sí amach ach ní raibh sé i bhfad gur thosaigh sí ar an mbainseó, an uirlis ab ansa lena seanathair, Kevin.
Bronnfar an Gradam Ceoltóir Óg na Bliana ar an bhfidléir Sorcha Costello as Tulach in oirthear Chontae an Chláir.
Bronnfar an gradam do Chumadóir na Bliana ar Steve Cooney, an giotáraí aitheanta as an Astráil a tháinig go hÉirinn sa bhliain 1980 agus a d’fhorbair stíl tionlacain ar leith agus é ag cur faoi i gCorca Dhuibhne. Bronnadh an Gradam Siamsaíochta Náisiúnta air féin agus ar Shéamus Begley sa bhliain 1997.
Is ar Niall Hanna as Tír Eoghain a bhronnfar an gradam d’Amhránaí na Bliana.
Bronnfar Gradam Saoil na bliana 2021 ar an gCorcaíoch Seán Ó Sé, a bhain cáil amach ar dtús mar amhránaí. ‘An Poc Ar Buille’, a chan sé agus a thaifead sé le Seán Ó Riada agus Ceoltóirí Chualann sna 1960idí, an t-amhrán is cáiliúla dá chuid.
Bronnfar Gradam Comaoine na bliana 2021 ar The Glengormley School of Traditional Music.
Dúirt Alan Esslemont, Ard-Stiúrthóir TG4, go léiríonn Gradaim Cheoil TG4, atá 24 bliain ar an bhfód i mbliana, ómós do dhaoine “a bhfuil an oiread déanta acu ar mhaithe leis an gceol traidisiúnta a thabhairt chun cinn agus a neartú anseo in Éirinn agus ar fud an domhain”.
Is i ndilchuimhne ar Mary McPartland a bheidh searmanas gradam na bliana seo, a dúirt Alan Esslemont.
“Ba í Mary a chuir tús leis an nGradam Ceoil an chéad lá riamh 24 bliain ó shin,” ar sé.
Dúirt Áine Walsh, Ceann Chiste Craoltóireachta Gaeilge Scáileán Thuaisceart Éireann go raibh an-áthas ar an gCiste tacú leis na gradaim le ceithre bliana anuas.
“B’iontach an rud é an tseoid cheoil seo i sceideal TG4 a bheith á craoladh beo ó Bhéal Feirste. Ní raibh sé i bhfad gur gnáthimeacht a bhí i nGradaim Cheoil TG4 anseo; thug an seó beo agus an fhéile fringe ardán den scoth do cheol agus do dhaoine cumasacha an Tuaiscirt. Beimid lánmhuiníneach, fad a bheidh an seó deiridh ar siúl ó Bhéal Feirste, go mbeidh lorg láidir ceoil fágtha ina dhiaidh.”
Dúirt Ardmhéara Bhéal Feirste, an Comhairleoir Kate Nicholl gur “imeacht iontach” é a chuireann “ardán ar fáil do scoth na gceoltóirí agus na n-amhránaithe”.
…
Is é seo a leanas an liosta iomlán de bhuaiteoirí Ghradaim Cheoil TG4 na bliana 2021:
- Ceoltóir na Bliana: Angelina Carbery
- Ceoltóir Óg na Bliana: Sorcha Costello
- Cumadóir na Bliana: Steve Cooney
- Gradam Saoil: Seán Ó Sé
- Amhránaí na Bliana: Niall Hanna
- Gradam Comaoine: The Glengormley School of Traditional Music [i/nfobox]
