Tá an chuma ar an scéal nach mbeidh aon scéim teanga go deo ag Feidhmeannacht na Seirbhíse Sláinte, a deir Cathaoirleach Choiste Oireachtais na Gaeilge agus na Gaeltachta.
Dúirt cathaoirleach an choiste, Aengus Ó Snodaigh, an Teachta Dála de chuid Shinn Féin, go raibh an baol ann go bhfágfadh “moilleadóireacht” an HSE go mbeidh deireadh curtha le córas na scéimeanna teanga sula mbeidh a gcéad scéim aontaithe acu.
14 bliain ó shin, sa bhliain 2007, a threoraigh Aire Gaeltachta na linne sin don Fheidhmeannacht scéim teanga a ullmhú ach níl a leithéid curtha i bhfeidhm fós ag an bhFeidhmeannacht Sláinte.
Ráineodh nach bhfeicfear a leithéid go deo anois, dar le Ó Snodaigh.
Deirtear i mbille teanga nua an Rialtais, a bhfuil faoi láidriú a dhéanamh ar an Acht Teanga, go dtabharfar isteach córas na gcaighdeán, córas nua ina leagfar amach na dualgais ó thaobh na Gaeilge a bheidh ar chomhlachtaí poiblí.
Faoi láthair, aontaíonn gach comhlacht poiblí a scéim teanga féin le Roinn na Gaeltachta ach tá an córas sin tite chomh mór sin in aimhréidh gur éirigh an Coimisinéir Teanga as monatóireacht a dhéanamh ar scéimeanna teanga mar gur “cur amú acmhainní” é.
Faoin mbille teanga nua, leagfaí dualgais chaighdeánacha éagsúla ar chomhlachtaí poiblí, ag brath, mar shampla, ar an méid teagmhála a bhíonn acu leis an bpobal.
Dúirt an Coimisinéir Teanga Rónán Ó Domhnaill ag cruinniú de Choiste Oireachtais na Gaeilge inné nach léir go bhfuil dualgas reachtúil ar an bhFeidhmeannacht i dtaca le roinnt mhaith de na hábhair ghearáin a cuireadh faoina bhráid mar nach bhfuil scéim teanga náisiúnta aontaithe ag an eagraíocht fós.
Thug Ó Domhnaill le fios go raibh scéim teanga daingnithe ag Limistéar an Iarthair den Fheidhmeannacht ó 2005, ach gur chuir a oifig in iúl do Thithe an Oireachtais sa bhliain 2011 go raibh teipthe ar an eagraíocht sláinte an scéim sin a chur i bhfeidhm.
