Craobh na Sé Náisiún: Éire vs an Fhrainc, an t-atmaisféar i bPáras

Aoife Ní Chrualaoich 

Mar is eol do chách, tá Craobh na Sé Náisiún faoi lán seoil anois. 

Bhí an t-ádh dearg orm dul chuig an gcluiche Éire i gcoinne na Fraince i ‘Stade de France’, i bPáras. Ní gá a rá go raibh an t-atmaisféar leictreach timpeall na cathrach na laethanta roimh an gcluiche. Bhí glas na hÉireann le feiceáil sna háiteanna a mbíonn an-tóir ag turasóirí orthu; Eiffel Tower, Sacré Coeur, Champs Elysées.

Ba é an rud is spéisiúla faoin deireadh seachtaine sin ná bhí sceitimíní an domhain ar gach aon Éireannach thall sa Fhrainc. Tuigtear go forleathan gur daoine an-fháilteach iad na hÉireannaigh agus gan aon cheist ná dabht, tá sé sin fíor. Tarraingíonn na hÉireannaigh Éireannaigh eile go háirithe i dtíortha i bhfad i gcéin. B’fhéidir go mbíonn sé furasta na hÉireannaigh a aimsiú nó b’fhéidir go mbímid go léir le fáil sna tithe tábhairne Éireannach thar lear. É sin ráite, caithfidh mé a admháil gurb é an rud is suntasaí faoi na hÉireannaigh ná labhraímid le gach duine, is cuma linn faoi aois, stádas nó cuma fhisiciúil. Bíonn comhthuiscint ann idir na hÉireannaigh go háirithe idir na hÉireannaigh atá ag maireachtáil thar lear. 

Cé gur chailleadh an cluiche, bhí an chomrádaíocht do na foirne le brath go láidir i bPáras. Ní hamháin sin ach ba léir go mbíonn meas mór ag na himreoirí ar a n-iomaitheoirí. Roinneadh físeán croíúil ar na meáin de Tadhg Furlong ag tréaslú imreoir Francach tar éis an chluiche sa seomra gléasta. ‘How are things bossman’ a dúirt sé agus bhain siad sult as beoir le chéile. 

Má tá seans ag aon duine freastal ar chluiche den Chraobh na Sé Náisiún, tapaigh an deis! Is taithí dochreidte í an t-aintiún Éireannach a chloisteáil agus tacaíocht láidir do na hÉireannaigh a bhrath thar lear.

Gan aon cheist ná dabht bhí glas na hÉireann le feiceáil i ‘Stade de France’ ach ag an am céanna, bhí bród agus aontacht na hÉireannaigh le brath go fíochmhar. Táim ag labhairt ar ár son uile go léir ach táim cinnte gur mhór an onóir ab ea é dúinn a bheith Éireannach ar an lá sin. Éire abú!