Bhailigh na mílte Caitliceach i gCearnóg Pheadair sa Vatacáin inniu do shochraid an Phápa Benedict XVI.
Ba é seo an chéad uair le cúpla céad bliain go raibh pápa i gceannas ar shearmanas sochraide iarphápa.
Le linn an Aifrinn, mhol an Pápa Proinsias an “gaois cineáltacht agus cráifeacht” a léirigh an Pápa Benedict.
Ag deireadh an tsearmanais, thosaigh daoine ag bualadh bos don iar-phápa atá imithe ar shlí na fírinne.
“Santo Subito,” a bhéic roinnt daoine agus iad ag iarraidh go ndéanfaí naomh láithreach den iarphápa.
Roimh an searmanas, a cheiliúir cairdinéil, easpaigh agus sagairt in éineacht leis an bPápa Proinsias, cuireadh ar taispeáint i mBaisleac Pheadair corp Benedict. Thapaigh na mílte de lucht a chaointe an deis siúl thar bráid a chónra adhmaid, chun ómós a thabhairt dó.
Cuireadh Benedict i dtuama san uaimh faoin mBaisleac, áit a raibh an Pápa Seán Pól II curtha i dtuama ar feadh tamaill.
Cuireadh in éineacht leis an bPápa Benedict roinnt bonn de chuid na Vatacáine agus rudaí eile a bhaineann leis an bpápacht. Cuireadh leis sa chónra chomh maith cáipéis i Laidin ar a bhfuil cur síos ar chuid de na heachtraí is suntasaí a tharla le linn a phápachta.
Deir an cháipéis gur “throid sé go diongbháilte” chun deireadh a chur leis an mí-úsáid ghnéis san eaglais.
Bhí an cháil ar Benedict gur pápa an-choimeádach a bhí ann agus mhaígh lucht a cháinte gurbh é cosaint na heaglaise an chloch ba mhó ar a phaidrín i gcónaí.
D’fhreastail ceannairí stáit, monarcaí agus baill den chléir ó ar fud an domhain ar an tsochraid.
Bean ó Leitir Ceanainn i nDún na nGall, Mary Maguire, a léigh an Dara Léacht ag an Aifreann sochraide, sliocht as Céad Litir Naomh Peadar.
Dé Sathairn seo caite a bhásaigh Benedict, a bhí 95 bliain d’aois. D’éirigh sé as a chúram in 2013, an chéad phápa a rinne amhlaidh le 600 bliain.
