Gan aon athrú ar chéatadán na mban ar Ainm.ie tar éis ceithre bliana
Níl aon athrú tagtha ar chéatadán na mbeathaisnéisí faoi mhná atá ar an suíomh beathaisnéisí Gaeilge Ainm.ie ó d’admhaigh Fiontar agus Scoil na Gaeilge go raibh “ganntanas ban” ar an mbunachar de dhaoine mór le rá i stair na Gaeilge.
Dúirt Fiontar agus Scoil na Gaeilge, an dream atá taobh thiar de Ainm.ie, in 2019 go raibh ganntanas ban ar an mbunachar ach go raibh líon na mbeathaisnéisí faoi mhná a bhí ar an suíomh “ag dul in airde, más go mall féin é.”
Cé go bhfuil ardú tagtha ar líon na mbeathaisnéisí faoi mhná ar an suíomh in imeacht na gceithre bliana ó shin fágann an t-ardú atá tagtha ar líon na mbeathaisnéisí faoi fhir nach bhfuil aon ardú suntasach tagtha ar chéatadán na mban ar Ainm.ie.
Cuireadh ceathrar ban eile leis an suíomh le deireanas – Úna Ní Mhaoileoin (1927-1994), Máire Uí Fhlatharta (1930-2020), Cáit Ruiséal (1860-1941), agus Máire Ruiséal (1855-1949).
Tuairiscíodh ar NÓS in 2019 go raibh tuairim is 1,700 beathaisnéis ar fad ar Ainm.ie agus gur bheathaisnéis fir a bhí i gceist le 90% (1,593) acu sin. Ní raibh ach 176 beathaisnéis faoi mhná ar an suíomh an t-am sin.
Thug urlabhraí de chuid Fhiontar agus Scoil na Gaeilge le fios do NÓS go bhfuil 1,801 beathaisnéis ar an suíomh anois agus gur beathaisnéis fir atá i gceist le 89.66% de na beathaisnéisí atá ar an suíomh in 2023.
Fágann sé sin gur tháinig ardú 12 bheathaisnéis mná agus 20 beathaisnéis fir ar Ainm.ie ó bhí 2019 ann ach nach raibh ach ardú 0.44% ar chéatadán na mban ar an suíomh.
“Tá Orlaith Hickey i mbun taighde PhD faoi láthair ar dhoiciméadú na mban i mbunachar beathaisnéisí Ainm.ie agus feabhasófar ionadaíocht na mban ar Ainm.ie de réir a chéile,” a dúirt urlabhraí de chuid an tsuímh le NÓS.
Dúirt Fiontar agus Scoil na Gaeilge in 2019 gur “léir don dall” go raibh easpa ban ar Ainm.ie ach gur “fadhb aitheanta” é i gcúrsaí beathaisnéise go mbíonn “gannionadaíocht i gceist le grúpaí áirithe” i gcnuasaigh ar fud an domhain.
Cuirtear beathaisnéisí nua le Ainm.ie go tráthrialta, agus ní chuirtear cuntas ar dhaoine atá fós beo ar an suíomh. An mhí seo cuireadh seachtar eile leis an mbunachar, an ceathrar ban thuasluaite agus triúr fear: Albert Fry (1940-2021), John Heely (1759-1831), agus Liam Ó Dúlacháin (1928-2001).
Ba mhná iad 22.4% de na beathaí a scríobhadh idir 2013 agus 2019. Tá ardú tagtha ar an gcéatadán sin don tréimhse 2019-2023 – ba mhná iad 37.5% de na beathaí a scríobhadh le ceithre bliana anuas.
“Tá tionscadail éagsúla beathaisnéisí tar éis aghaidh a thabhairt ar an gceist trí thaighde breise a dhéanamh ar bheathaí a fágadh ar lár sna bunfhoilseacháin agus trí imleabhair bhreise nó forlíontáin a fhoilsiú chun cuid de na heasnaimh seo a chúiteamh a dúradh i ráiteas a d’eisigh Fiontar in 2019.
