Cé gurb é toghcheantar Bhéal an Mhuirthead an ceann is mó sa chontae, níor thóg sé ach dhá chomhaireamh chun triúr comhairleoirí a thoghadh cúig bliana ó shin. Meastar go dtógfaidh sé beagáinín níos faide na suíocháin a líonadh an uair seo agus beirt iarrthóirí níos mó ag seasamh, ach ba cheart go mbeadh toradh againn luath go maith tar éis tús an chomhairimh.
Bóithre, cúrsaí pleanála agus feirmeoireacht atá ag dó na geirbe ag muintir an toghcheantair, mar a bhíonn i go leor toghcheantair thuaithe, ach cuireann muintir Acla agus Bhéal an Mhuirthead béim ar chúrsaí turasóireachta freisin.
Tá Gerry Coyle Fhine Gael ina chomhairleoir le blianta fada agus meastar go mbeidh sé ar bharr an chomhairimh i mbliana, mar a bhí in 2019. Beidh Paul McNamara ó Fhianna Fáil, a toghadh cúig bliana ó shin, ag súil le tacaíocht ó mhuintir Acla agus é i mbun feachtais chun duine ón oileán a choinneáil ar an gComhairle.
Béal an Mhuirthead (3 shuíochán)
Na hiarrthóirí
Gerry Coyle (FG)*
Pat Chambers (FG)
Rosaleen Dixon Lally (SF)
John Paul Carey (NS)
Micheál Boxty Ó Conaill (CG)
Paul McNamara (FF)*
Seán Carey (FF)*
Jay Heneghan (NS)
Fear eile ó Fhianna Fáil, Seán Carey, a toghadh in 2019 ach meastar go mbeidh sé ina chath idir é féin agus Rosaleen Dixon Lally chun an suíochán a fháil an uair seo. Chaill Sinn Féin suíochán sa toghcheantar sa toghchán deireanach ach, toisc gurb í Dixon Lally an t-aon iarrthóir ag Sinn Féin sa toghcheantar, ní bheidh an vóta don pháirtí á scoilteadh, mar a bheidh i gcás Fhianna Fáil agus Fine Gael.
Comhairleoir amháin a d’fhéadfadh a bheith ag na trí pháirtí is mó sa tír mar sin, Coyle, Chambers agus Dixon Lally.
Caisleán an Bharraigh (7 suíochán)
Na hIarrthóirí
Ger Deere (FG)
Donna Sheridan (FG)
Maura O’Sullivan (SF)
Cyril Burke (FG)
Stephen Kerr (NS)
Donna Hyland (SF)
Brendan Lavelle (NS)
Donal Geraghty (Ind Ireland)
Aidan Browne (DS)
Maksym Shalomon (NS)
Kamal Uddin (LO)
Gerry Loftus (NS)
Joe Daly (PBP-S)
Michael Kilcoyne (NS).
Tom Moran (The Irish People Party)
Blackie Gavin (FF)
Al McDonnell (FF)
Martin McLoughlin (FF)
Harry Barrett (NS)
Bhí an comhaireamh chomh fada i gCaisleán an Bharraigh in 2019 is a bhí sé gearr i mBéal an Mhuirthead. Toghadh na hiarrthóirí deireanacha ar an 13ú comhaireamh cúig bliana ó shin agus ó tharla 19 iarrthóir a bheith ag seasamh an uair seo, beidh cúpla lá fada rompu san ionad comhairimh i gCaisleán an Bharraigh
Tá ceantar Thuar Mhic Éadaigh istigh sa toghcheantar plódaithe seo agus gach comhairleoir a toghadh cúig bliana ó shin ag seasamh arís.
Ba é an comhairleoir Neamhspleách Michael Kilcoyne a chríochnaigh ar bharr an chomhairimh in 2019 agus tá talamh slán á dhéanamh de gur mar sin a bheidh sé arís an uair seo. Meastar go bhfuil seans maith ann freisin go gcoinneoidh beirt Fhianna Fáil, Blackie Gavin agus Al McDonnell, atá ar an gComhairle le 36 bliain, a gcuid suíochán agus go dtiocfaidh Ger Deere ó Fhine Gael slán arís.
Mar a tharla i mBéal an Mhuirthead, chaill Sinn Féin suíochán sa toghcheantar seo sa toghchán deireanach ach tuigtear go bhfuil tacaíocht láidir ag Donna Hyland an uair seo agus go bhféadfadh sí suíochán a sciobadh ó dhuine den triúr a toghadh ar an gcomhaireamh deireanach in 2019 – Cyril Burke (FG), Martin McLoughlin (FF) agus Donna Sheridan (FG).
*Comhairleoirí Contae
